uïïun  152, 

mggyur 2959

  (Décembre  2009)

Amezwaru

 (Page d'accueil) 

Tamazight

içnga imdadtn n tutlayt taorabt

tirra s mazivt: man tayafut?

Irifiyen n Fraku

Inwjiwn n ughlluy

Ijjign gh lqaloa n umggun

Tarja n arrimet s raxart nnes

Mayemmi neccin d imeggura

Ungal n "Nunja tanecruft n izrfan"

Tafunast n jeddi

Tisfay n tayri

Tayri inw

Xatci rwazna

Français

Tichonius, le chrétien iconoclaste

La culture amazighe entre le sérieux et l'ironie

La désertification culturelle

Poetas del Mundo et Tamazgha

العربية

الأعداء الحقيقيون للغة العربية

ماذا لو أن الأمازيغية...؟

التعريب رجس من عمل الشيطان

أن نكون "نينيين" أو لا نكون

تصور علي شوهاد ومجموعة أرشاش لأملرك

الحركة من أجل الحكم الذاتي للريف: هواية أم سياسة؟

قراءة في ديوان الشمس الآفلة

مجلة مركز الريف لحفظ الذاكرة

جمعية سكان الجبال تحل بتغسالين

بيان تامازغا/الحسيمة

جمعيات الأطلس في لقاء بأزرو

تجديد مكتب جمعية تانكرا

بيان تنديدي للتنسيقية الوطنية

بيان الحركة بموقع القنيطرة

بيان جمعية تامازغا بالعروي

تجديد مكتب جمعية تيفاوت

 

 

 

Irifiyen n Franku: jar tasekla d umezruy

Yura t: Andich idir

 

Deg umegrad a war ntic bu ca n taynit d tameqrant i tasnakudt (chronilogie) n imcumbucen i yegga Franku di tmazirt n Svbbanya, ura d uswizi n irifiyen day s. Nxes ad nidar cwayt n izlan i tugha qqaren irifiyen d trifeyin mahend ad nawedv ad nessen tamlilt (rôle) n tasekla tamazight deg uzemmem d hettvu n tmekttit, s uyenni iqqen ura d neccin ad nzemmem izlan a itwannan dg ukud nni hima tamekttit tanamurt (la mémoire nationale) war tweddvar, u war tettviw aked usvemmidv.

Bac ad nssiwel xef wakud n umenghi n Franku (i zi itwassnen ghar irifiyen) di Svbbanya d uswizi n irifiyen d imerrukiyen day s, ixesv zeg umezwar ad nedwel cwayt ghar udeffar afad ad nessegzu anaw n wassagh (pour comprendre la nature de la relation) illan jar arrif d Ibiriyen Isvbbunya .

Amsawadv i tugha illan jar asen d azayku s wattvas, war ghar s ibuda ura d iguttuten, itwassenta s usmskel n tsebbabt u yesyura s imenghan (Mritc, Sidi Waryac, Tittvawin …) .

Aked tlalit n taymberyalit tamedvlant ssentan Isvebbunya arezzun xef ca n imucan zeg umadval ipebbaj , amec i tugha traghan i Irubbiyen i yeghrfan n tafriqt d asya… d min i zi itwassnen awrud s timura n umadval wiss kradv.

U mahned ad ttun tasekna n Kuba (1895) Isvbbunya xezzarn d ghar yeffus nsen, maca deg yeffus a yemsar asen ujar zi Kuba s cra n mraw n twaratin, war kkar ad ssarsen inyen nsen (dssas nsen) di arrif ar mani i zzay sen zvrin muc d ungar, awarni i wattvas n imenghan di arrif, amezwaru akd wanag (martyr) Muhemmed Amezvyan (1909-1912) d umcubbec n userillt s adu i tehngart n Mulay Muhend (1921-1926) u ghar uneggaru qao id yussa uswizi n imerrukiyen imazighen deg umenghi agharim (La guerre civile) n1936-1939.

Deg umezwaru iqqen ad nidar imentilen n tidet i yejjin irifiyen hima ad bbulsen s bezzez deg userdas n Franku, ttini ict tghuri tegg it tamssigelt u tamerzzut deg yeyyar n umezruy « Marria Ruza Madariga » belli tugha din ijjen ubarreh d ameqran di marra tighemmura n arrif, iqqar, ixes zeg irifiyen ad kkaren ad bedden aked Franku mgal (contre)i marksiyen d icuoiyen i war itghiren s tilawt n Wakucc, ujar zi manawya tugha dinni cra ineghmisen sxarrqen, qqaren ira Franku yedwer d amslem, zvrin t iwdan di Mekka u yexs ad islekk Svebbanya zi tqebbidvt n irumiyyen d imarksiyen, ad tt yarr d tameslemt, u deg yeyyar a tirar zzawect Taderqawit ict temlilt d taxatart deg ubarreh yad, amec umi itlaghan dghi amussu anamur (mouvement national) yegga ixef nes d aderghal war itwili, d adepcur war itseli, minzi di ltva nni iwca Franku i ‘wmeghnas’ Obdlxaleq Ttvurris tazrfanit i wkabar nes amaynu aodvar anamur, rexdenn id tseqsa Mariya Ruza Madariga deg udellis nes «imerrukiyen di tawuri n franku»: (Mara imayar n ifaciyen d tiberkanin, tenni n i naziyen hdvqent , taynart Tasbanyut d tazerwalt, pi man tt initen (Couleur) i ghar s ghar inamuren imerrukien ? ).

Di turda ynu idjan d turda ura n Marryia Ruza imentilen i yejjin tadersi (minority) n irifiyen ad bbulsen deg userdas asvebbanyu, netta d tzawa i yezvra Arrif jar 1934 d 1935 i di islulen s ijjen n uzledv irqef aorahar marra rwacunat n arrif. War ntettu ca arpaj i ssuysen Isvebbunya d Ifransisen aked tawiza n lmexzen xef redcur n arrif, islul d reprac n uxenzir, imjaren attvas n imezdagh, danita yeqqar ijj n izli d amazigh:

"Jj ayi a yemma, jj ayi ad bbulsegh. Ict tbuyut ad tettegh, ict n ad am t id sqadvegh".

Maca waxxa amenni ticcemt n irifiyen tugha ten mgal n webbules nsen deg userdas, s unegmedv awarni i “ wlaghi id yussin deg ict n tebrat issudver it mass Azerqan aneghlif n ugensu di ltva n tagduda tarrifit zi Fass i tettar day s zeg irrifiyen mahned war tilin ca aked Franku… deg ussegwas n 1936 yedwel abbules iqseh raminni war d idwil ura d ijjen zeg imerdas imezwura ibbulsen”(1) , marra imentilen a jjin isvebbunya ad ggen marra min ghar sen d tizemmar hima ad sbezzezn abbules xef irifiyen, s uya yuss d ijjen n uwardi zi tnebdvt tasbaniyut ghar imgharen n tqebbal, tettar zi kuy taqbilt ad tsbules 500 n umerdas zi tarwa nes s ughir, ar mani i yiwedv uttvun ghar 65000 amec teqqar “Marriya Ruza Madariga”, ad nidar ijjen sin n izlan izzuguzen addad n tiklisent (psychologie, absikyluji) n irifiyen marra deg wakud nni jar 1934 d 1937 i ssawlen xef ubbules n bezzez:

"Uma mermi yuyar, mermi yenya! Uma mermi yenna: Llap ipennik a yemma” .

D ijjen nnidven imsarwas aked wen id as yezzaren .

"Rebbi mermi nura, rebbi mermi nezwa! Rebbi mermi nenna: Llap ipennik a yemma”.

Izlan a ssecanen anegh ijjen n wudem d amezvyan i webbules n bezzez i yemsaren deg wattvas n iraqqen di arrif. Ad nawedv ghar ijjen ugmudv d aneggaru: irifiyen war xisen bu ad bbulsen deg userdas n Franku zeg umezwaru, mayinzi war ttun ca deghya amezruy nsen iccuren s idammen aked Usvbbanyu, war ttun ca ussan nsen aked Mulay Muhend, arni xaf s yenni ixsen ad irin aked Usvbbanyu, ntaf d zvledv i ten ioarnen ghar ubbules.

Maci mghir irifiyen i tugah deg userdas Usvbbanyu danita teqqar Marryia Ruza Madariga belli dinni 9000 n Ubaoemrani (zi ayt baoemran) iccaten urdvun , aked cra n imerdas zi regnus tidiktaturyin timeddukal i Svebbunya , zzay sen inaziyen Ilimaniyen, Ifaciyen Itvalyen, Icuoiyen n Arrusya, timeggura yad tugha trajant zi Svbbanya akidsen tmyawaz deg imenghi tamdvlant wiss sin (1939-1945) d manawya i war imsaren min y jjin tadiktaturit n Svebbanya ad teddar ar 1975 itsemma ar raxart n Franku .

Da izlan irrifiyen qqaren:

-"Aliman Aliman, a memmis n tfunasin,

Cek id anegh yejjin nssudum tizeyyatin".

- "Wami id icarref xef dpar n Xarraba

Issugd as Arruxu imun d aked Arrusya".

Raminni iwdven irrifiyen ad swizan deg imenghan n Isvbbunya ggin ten d ijjen ugeddim n weksum i ghar isreqqan xef yennidven illan awarni tsen, s uyenni attvas n irifiyen ruhen mmuten u nyzemen u deg usenti n imenghi yad, deg assegwas n 1936 aorahar war d idvwir ura d ijjen zzay sen, s uyenni amec nnigh di min yeodvan, tedvwer svbanya ghar ubbules n irrifiyen s bezzez, irifyen deg ussan ni twaran ict n tmeslayt zzat nsen tiriw d tebbarken nettat d Raxart, ar mani idvwel usntel (sujet) n raxart d temttant issu yiman n irrifiyen amec it id yusa deg izlan yad:

- "Byyes a byyas nnem, tegged xaf s remdvemmett, Neccin nura ad nezvwa, ghar Svebbanya ad nemmet".

D ijjen nneghni:

- "Byyes a byyas nnem, oder as zzeyar

Abulis n Madrar (Madrid ) wellap oemmar s tezr it"

-"Wami tedvwa tejdvidvt , tedvwa ttveyyara

Teysi irrifiyen tewca zzay sen i ujenna".

- "Agharrabu n urumi di Mritc itraj ayi

Ralla tammurt inu oemmars tzrid ayi" .

Jar ifassen nnegh ijjen izli itic i wen id as itslan ict tulaft teccur s tasekna, izli yad issawal xef umsafadv n tarwa n ijjen rwacun:

- "Munend ihenjiren xef ssinyyett

Neccin qa nuyar ghar Svebbanya ad nemmt".

Amec tezrim u tehadvam deg izlan a yecnan i yesnflel zpir n tegrawt n irrifiyen, asentel n tmettant ghar s tansa nnes di tiklisent (psychologie, tabsikyulujit) n urrifi s unegmedv awarni i wadaf nsen deg imenghi uffin ixef nsen d ageddim n uksum, marra teyyit a day sen itekk d amezwaru, attvas n ineyzam i di iwettvan d ubarru n inagen, min ijjin raxart tezdegh ixsan nsen u tacan akides mani memma rahen nigh mmutyen di Svebbanya, kuy ass tghiren t d ameggaru di firu n buhber nsen.

Maca arrifi issenta itxarrves aked yiman nnes, itseqsa ixef nes (min da teggeh nec?!), ujar zi manawya yuffa itnqtmar xef ict n tesghart xef ijjen yijjed ( religion) ghar umeggar netta war day sen itarss walu, rexdenn id itkkwar addad it yejjin ad yili aked imenhas a n isvebbunya u tessnta tassddect n tarwra zi tmessi nni tasvemmadvt i yejjin aksum nes d taneghda .

imenghi ya yekka xef wattvas tiferkiwin (étapes) ad nidar cra zzay sen maca war yedji amec itoawadven imarzzuten d imssiglen, upu! Ad noawedv zi teghmart amec it itwara umedyaz arrifi:

- Agharrabu n urumi di Mritc itraj ayi

Ralla tammurt inu oemmar s tezrid ayi

- Ghezzu day tegga Svebbanya di Malagha

Rami i day i tiwwi tarwa n oemmi marra.

- Kkin s nnej i wjenna, min d ghedvren d amettva

Xedvren ghar Tulidvu arnin ghar Malagha.

- Ixedvr d ghar Xuzirat yufa murvu yarsa

Yarhem Arebbi yemmas ten das ggin lehla.

Deg ugensu n umccumbc d imenghan, atarras yedwel ifetteh deg yilen n idvammen n ineyzam isghuyyun s tiqest n iwzwizen, jar luluf n yenni itmettan kuy ass, ca nedvren t mani ghad yewdva, tadersi zynfan ixsan nsen di tmurt mani i d lulen, maca yenni iked ybedd zpar, jar idvennadv arrifi tughat d ahhuri xef tmurt nnes d wass a aqatt d ismegh jar ifassen n Franku, jar idvannadv d wass a jar min izriyen d yidv a qqimen cra n izlan toawaden i warraw amaynu min yekkin xef irrifiyen di tmessi n Ibirya:

- Rburqi n zzaj di Svebbanya ipeddem

Min iwi d arumi, min iwi d amsrem.

- Xeccen ghar tmurt, ghar timessi targha

Aksum nsen yedwer d taneghda.

- Dinni iqdvan ifutixen n sbotac asna

Ticcuccay nsen d rferfer immwa.

Imenghan a slulend abarru n ineyzam d imeodvar d cigan irahen ddaren dwren d aked usemmidv d tnifest, zeg yenni immuten wen iked ibedd zpar qa xef rmehmer itwaksi d ad zedghen ixsan nnes, tamurt d ucal nnes.

- Ttvumubil tazegwaght id yeksin imeodvar

Teysi d Loebbudi, d Oumar ikes as udvar.

- Hedd yekes as ufuss, hedd yeks as udvar

Svebbanya tireft tejja anegh d imeodvar (2).

Zeg ussegwass ameggar n umcumbec ar dghi ( ar djuxa) tezri cra n 70 issegussa, imccarcuten day s twattun ra zi tanbadvt tasvebbanyut ra zi tanbadvt tamerrukit, itoini nitni tugha ccaten urdun sbnghar ma ad ssnen belli qa ssgaoden deg ijjen udiktatur icca aydud nes anict i yecca aksum nsen , iswa tidi n waydud nes anict iswa tidi nsen , s uyenni marra iggagen ura d isertanen trakkwaren ad xaf sen ssiwlen, war ten tidraen axminni oemmar s war swizan deg imenghiten a .

maci am Imrrukyen n umenghi umadval wiss sin asl ma ad ssnen ura nitni ssigwjen ifacyen d inazyen iodawen n tudert d tefganit s nnej i yexsan nsen , da ntaf (mgal i waddad izryen ) attvas n imussnawien tettaren zi tenbadvin nsen ad as naren taynit u ad asen arnin di tmnyat , jar sin n iddaden a n Imerrukiyen itghima amerruki amazigh d netta iccin aomud attvas. Maca mahned ad yili ijjen umuzzu (tolerance) jar irifiyen d isvbunya ixesv ad dwlen ghar tamekttit i ten icarcen , ad odren min ixesven ad itwaoder , hima ad nbna ijjen imal iccur s tidukla .

ar danita niwedv ad nssen u ad nssij xef tamlilt n izlan d wazzvri nsen , izlan innan inuba nnegh wcin anegh d ict tulaft tiriw xef waddad nsen , d mammec i tugha tacan? d min imsaren nican , maca ixesv ad tili ict twiza zi marra imeghnas imazighen it arran taynit i ddab a n tsekla tatlayt ad smunen tizemmar nsen hima ad nyru min war itwazemmemen oad, bac ad nehdva tamekttit nnegh zi tmettant, hima war ntghimi am tbaghra nni ixsen ad tgg ticri n ttawes tuffu d rid d ticri nes rid d ticri n ttawes .

Tizmilin:

1) Tawiza, uttvun wis 117.

2) Izlan nni twaksind zeg udellis n izran, i tegga Mayssa Racida Lmerraqi.

 

 

 

Copyright 2002 Tawiza. All rights reserved.