uïïun  152, 

mggyur 2959

  (Décembre  2009)

Amezwaru

 (Page d'accueil) 

Tamazight

içnga imdadtn n tutlayt taorabt

tirra s mazivt: man tayafut?

Irifiyen n Fraku

Inwjiwn n ughlluy

Ijjign gh lqaloa n umggun

Tarja n arrimet s raxart nnes

Mayemmi neccin d imeggura

Ungal n "Nunja tanecruft n izrfan"

Tafunast n jeddi

Tisfay n tayri

Tayri inw

Xatci rwazna

Français

Tichonius, le chrétien iconoclaste

La culture amazighe entre le sérieux et l'ironie

La désertification culturelle

Poetas del Mundo et Tamazgha

العربية

الأعداء الحقيقيون للغة العربية

ماذا لو أن الأمازيغية...؟

التعريب رجس من عمل الشيطان

أن نكون "نينيين" أو لا نكون

تصور علي شوهاد ومجموعة أرشاش لأملرك

الحركة من أجل الحكم الذاتي للريف: هواية أم سياسة؟

قراءة في ديوان الشمس الآفلة

مجلة مركز الريف لحفظ الذاكرة

جمعية سكان الجبال تحل بتغسالين

بيان تامازغا/الحسيمة

جمعيات الأطلس في لقاء بأزرو

تجديد مكتب جمعية تانكرا

بيان تنديدي للتنسيقية الوطنية

بيان الحركة بموقع القنيطرة

بيان جمعية تامازغا بالعروي

تجديد مكتب جمعية تيفاوت

 

 

 

Ameghri:

Ungal n: “Nunja, tanecruft n izerfan”, aseffsi n iceddan n weydud Arrifi

Yura t: Sliman Belgharbi

Tamezwarut:

Ghar warni sin n idlisen n tenfas tiqudvadvin, ¨(Asvwadv yebuyebhen) d (Asfidjet), i zi issenta umarir amazigh Said BELGHARBI abrid n tira nnes deg usuffegh n idlisen n tsekla tarrifit. Deg idlisn a imezwura n umarir yegga tizzemmar mgharent mahend ad yewc ij n wudem i tira n tenfust taqudvadvt di Arrif, udem a i di netwara tifraz n Arrif, ameddur n irifiyyen, d imxumbar yeqqnen ghar tudart deg idenadv ad yidva nsen.

Amcubbec n Said Belgharbi iked tira, ura d netta d ict n tenfust umi yewca umarir Arrifi tudart nnes, tira n usefsi, asefsi i iceddan n weydud.

Tira n usefsi d ij n tazvuri umi yarezzu ad yegg umarir, izvewran iked tizemmar n imariren irifiyyen n yidva, igg i tarin deg iyyar n tenfust d ungal.

Waxxa tira deg iyyar n trifit d tsekla nnes, teggur zeg issegussa izeryen ghar zzat, s tizammar n yenni yeksin s wemnus n imar n tira s yires Arrifi.

Deg ungal nnes (Nunja tanecruft n izerfan), i d yusin am ij n mezri ghar umarir deg usemghar n tenfust ad tedwer d ungal, i di yessawar Said Belgharbi x timukrisin yeqqnen ghar umezruy d yidva ad yimar n weydud Arrifi, d tmurt n imazighen n Tamezgha, abrid n tira i di ntaff radjaghet n taycint d tidet n wawar, d tghuyyit ghar tirelli n utarras d weydud.

1- “Nunja” tamghart n tamara:

Tanfust n Nunja di jaj n ungal, d aceddi i di yesmun umarir ij n uoebbuz, yennugh deg wur nnes, d wemxumber ameqqran i di igg iteddar weydud Arrif i t yejjin yeggur ghar ticarmin d marra izuray n tudart zeg wattvas zi wami, tamghart d tisit i di netwara rimart d ghezzu n uhewwas, yeggin am twengint n imazighen.

Yeqqar umarir di ungal nnes: ”Di Tamzgha tugha ur da ghar negh bu reprac, reprec yus d zey manis nnidven”. Asebter (page) 11.

Kulira d reprac ineqq maca di raggwaj nnes ghar umarir yarezzu ad day s yesmun marra min ireqqfen irifiyyen n repracat d tamara i di teddar Nunja i terqef kulira, i di teddar n marra imazighen umi ten d yudeff uzref n midden d lbarrani ghar tudrin nsen.

Maghar min tegga Nunja ar ami tarbu anict uya n isendifen, izerfen n tirrugza yejjin Nunja ad teddar di tamara, izerfen n midden i zi dewren imazighen ssegguren zzay sen tudart nesen, izerfan yejjin baba s ad ihuz yedji s ad inegh tasghart n temghart di tudart nnes. Manawya itwara t umarir d ict n tewwart n umenghi yarzvem uhawwas mahend ad yacar tamurt d temghart n umazigh, i tugha yedjan war izemmar ura d ijj ad ten ihada.

Amenghi umi ggin amcan di Tamezgha jar waryaz d temghart, jar baba s d yedji s, jar tirrugza d tmettudvt, tugha war yedji ca ghar imazighen, suya tudert nsen temmut, tedwer am tudart n uhewwas.

2- Amxumber n wenneghnit:

Deg ungal a yeccuren s tasertit, ntaff amarir issawar x tighuni n uxarrves n urrifi, iked midden s ijj n wudem iweddvar n irifeyyen, axarrves deg ixf nnes d imunas nsen, advfar i teggen irifiyyen i tmukrisin n tmura n midden yejji ten teddaren di tudart n midden, huzen imxumbar nsen mahend ad ddaren tudart n midden am imxumbar n Falastvin d imxumbar n Waoraben iked Wudayen deg issegussa ya imeggura i di tedwer d tmukrist tamzwarut umi arrin imazighen taynit.

3-Arbatv, tamzida: iraqqen d iseqsan:

D tasmaqalt i itic umarir x sin n iraqqen day sen ict n rxezrat teccur s iseqsan x tidet iraqqen i yetwara, nitni i yeksen amcan n izerfan n imazghen, tamzida mani tedwer teksen day s tasghat n irifiyyen s yisem n Wakuc d Arbatv tamurt i di twahewwes tesghart n Arrif s yisem n tamunt tanamurt.

Iraqqen a d ict n tidet i di iteddar urrifi, war izzemmar ad ixarrves deg ibriden n tmurt nnes ura deg ixf nnes, yesmghar s midden issmezzay zi dcar d tmurt nnes.

4-Tussna d uffugh zeg imxumbar a:

S rxezrat nnes yegwjen, i yetwara Said Belgharbi tawwart n wuffugh zeg wemnus ameqqran i di iteddar weydud arrifi, i itrahen itweddar ixf nnes, suya taflamanit nnes tedwer deg ifassen n midden, yedwer war izemmar ad ixarrves, ura ad yiri, ura ad yesghuy. Tussna d wemsawadv n weydud izemmar ad yejj Arrif ad yeddar deg ict n tudart nnes, ad das yegg izerfan ness i tarwa nnes.

Suya ntaff tatarrast (caxsviya) n Idir am ijj n wesfedv yescana tighit i tarwa n dcar, am ijj n wareqqas n Wakuc n tussna yus d ghar tmura n imazighen.

5- Tutlayt n ungal:

Tabrat n tira ghar umarir deg ughezdis n wawar i zi yarcem ungal yudes ghar tira n usefru, suya nzemmar ad nini iwca deg ungal a ijj n wazvri i tira s trifit.

Mammec ntaff attvas n umsawar yudfen (munulug), manawya yejja amarir ad ifelsef di tira nnes, ad yewc nigh ad yessiwer x rexezrat nnes ghar tudart.

Itegg tizemmar deg iyyar n useggem n tira s tmazight n arrif, i ticc as tnufsetc ad tmsawadv iked ixf nnes deg ixf nnes d arrif, d temsawad ikd udmawen n imazighen n wawar mani ma djan di Tamezgha, tabridt a n tira tzemmar ad tiri d asghun iqqen ghar iyyar n ughimi n tutlayt tarifit d tamazight.

Suya nzzemmar ad nssiwer x uraqq n tasekla d tagrawla tadelsant (tawra tiqafiya) i yedjen ghar tira n Said Belgharbi

6-Timanitin titaresen (Psychologiques des personnages) n ungal:

Mara nekkar ad narzu ad nezuzzar timaniten n ungal umi yewca umarir tudart di tenfust a, nzzemmar ad nessiwer x wemsvebdvi n tmeddurt nesnt, mammec temsebdvant tebratin yarezzu ad zzay sent yessiwedv umarir ghar imeghray (Les lecteurs) n ungal.

Deg ughezdis a ad nessiwer x sin n timanitin (Les personnages) i tiraren deg wezzay deg waduff (daxer) n ungal, umi temsebdva “tabsikulujit”, jar iwdan i yuggin ad ddaren s izerfan iqburen, arezzun amaynu d tudart am Idir d Nunja.

D yenni yumnen s izerfan imenza i iweddvaren marra min d yedjan d amaynu ghar dcar d ijj n rmewt i marra izerfan umi tugha teggen tudart am Umghar, baba s n Nunja d Refqi d Zulixa.

Yarezzu umarir ad yescen, iceddan yedjan di tisi n tudart n dcar, iceddan i temsebdvan ca ghar s aceddi iked arrimet nnes, ca iked tusna nnes ca iked temgharin ca iked aryazen ca ghar s aceddi iked tudart, suya mahend ad yeswedv i ict n tesmaqatc x tudart d iceddan nnes yessiwer x yewdan mani yenna: (Dcar d tazubayt n iceden. Asebter (page) 24)

7-Akud d uraq deg ungal:

Deg ungal a war nzemmar ad nessiwer x wakud n tidet i di temsar tenfust a, nigh d ca n wemcan itwassen di arrif, suya itghima zmann d wemcan n ungal d iji n useqsi d ameqran ghar umarir, aseqsi nzemmar ad xafbs narr marra axmi ghad nghar ungal umi yarezzu umarir ad yirar deg uzedjif nigh di twangint nnegh, ghar umarir amazigh Said Belgharbi war t yecqi zmann nigh d amcan, yecqa t ufgan d tafgant Tamazight.

Suya nzzemmar ad nini aqqa tawengint n umarir tarezzu imazighen ad smunen axarrves nsen ghar wenni nnes, axarrvesv deg imar n Arrif d Tamazgha, suya tira ghar sent ijj n raggwaj d ameqran xmi ntaff amarir issexdam iman nnes attvas d min day ghar jaj n ixarresven yarezzu ad tyisi ghar tira ghar ict tudart war tmetti s ticri n zmann d ubedder n wemcan ghar wakud n tira, tudert tameggarut n uxarresv mkur amarir yarezzu ad inegh axarresv nnes s tira, axmi amarir i tari x mindi yedja yezginfa s wur d yixsen.

Tameggarut:

Nzemmar ad nini aqqa amarir Said Belgharbi di tira nnes d ijj n tewwart n tazvuri yennurezvmen deg webrid n tasekla n arrif, tawwart umi nesittim rebda tudart ghar zzat am ict n tburjet nesajja zzay s x umeddur n irifiyyen s tittvawin n umaru n Said Belgharbi, d iseqsan d imeqranen i tegg weydud x ixf nnes d iceddan n waryaz d temghart, umi i yarezzu ad affen ufughen.

Mammec nzzemmar ad nini aqqa tira n Said Belgharbi d ict n uceddi ghar umarir i yerazu ad tt yessfesi s tira, mahend war yetghim d amnus yisi t umarir x weorur nnes am tisi tmurt idurar nnes.

Sliman Belgharbi

BURGUS/ SEBBANYA

 

 

 

 

 

Copyright 2002 Tawiza. All rights reserved.