uïïun  157, 

smyur 2960

  (Mai  2010)

Amezwaru

 (Page d'accueil) 

Tamazight

arrifubya tdwl d vur ukavar n listiqlal

Jar twizext n tidet d tarja

Tawengint

Gar-muzzvel

Tamazight menchk n isggssen ad nejla

Di taddart

Français

La région: comment et pourquoi faire?

Timitar d'Azaykou

Réflexion sur la régionalisation

Aristippe de Cyrène

L'épopée de Ddhar  Ubarran

Quelle loi faut-il respecter?

Sortie du livre: is nsul nedder?

"Histoire et société de l'Adrar..."

Activités de l'association Tankra

العربية

وجوه "الريفوبيا" تعاود الظهور بحزب الاستقلال

ما معنى "الأمازيغي" لدى الأمازيغ؟

الأساطير المؤسسة لإيديولوجيا التعريب بالمغرب

أكره هويتي كره الزور

عربية القرآن حجة على العربان

هوية قسرية

حوار مع الباحثة جميلة فلاح

مولاي علي شوهاد: رؤية فلسفية في الشعر والفن

حوار مع المناضل انديش إيدير

تطورات جديدة في تظلم مومن الصافي ضد وزارة الثقافة

كتاب إقليم كرت

الإفراج عن المناضل ليديب بوبكر

بيان جمعية تامازغا

بيان مجلس التنسيق لتاماينوت

بيات لمعتقلي تزنيت

اختتام الدورة الثانية لجائزة أليس

بلاغ الحركة الأمازيغية لموقع أكادير

اللجنة التحضيرية لجمعية إزرفان

 

 

 

 

Tanfust:

Jar twizext n tidet d tarja

Yura t: Said BELGHARBI

 

D awardi i: “D asvudvem xef tenyart n jeddi Bezzah waxxa yemmut, d tenyart n henna Tapnuft waxxa teddar”.

Wami d anegh ksen aghrum; war nenni maghar?

Wami d anegh carfen di ticri nnegh xef ibriden nsen immexsen isvuraf nnegh; war nenni walu?

Ksem anegh marra min texsem, jjem day negh mghar tufganit nnegh, nigh ura d tenni teksem tet zzay negh war akid s nerpi! Maca tuca akid s “henna Tapnuft” wami tarzvem awezwiz nnes xef tefray n uyezzim inu, txeyyeq; izvemm wul nnes; tuzzel xaf s tzvwa d ghezzu nwem; d wenni n zeldv ghar ugaji, wami innejfer umettar zeg unedra n dcar, wami tzvum “tara n trussi”; teswa imareddiwen nnes.. deg akud nni i di tesmun henna ibehrar ghar ticri nnes; teghnes tinitin n ucar d afeqqus i wul nnes; huma ad tewoa mani djan waman.

“Jeddi Bezzah” war yuffi tisira zi ghar yuyar, ihuras n warri ighens iten s ifiran n ghumma n tjarrarin, xef tifednin nnes temxumbel tansa i ghar yettvef d ticri ghar mani mma.

Tallest n tmeddit tessusem xef tazeqqa n taddart tameqrant n ayt n “Umarzuq”, mani munen i tzeddight marra lwacun nnes, issufegh d jeddi Bezzah tazyawt ad yacar zi tesghart nnes, ixbec xef uqemmum n tesraft, iskeff d marra min day s itwaxemren n wagra, yarbu t xef uorur n tsardunt, iymsebriden izzenz min yezzenz, ura d tasardunt bedden ifadden nnes zegga tugha wdvan, tessens marra tamedit d nettat teghzaz; tarra ghezzu n uzughmet n yarden i tugha tezuyyet d macca n ijj n wass, tarwa n Umarzuq icciten bu tsira n tadvuft; adan nsen qessen; qarsven; mselghaghen iked ayawya nsen, d nitni tettaren anzvar xef iqemmumen n tesrafin nsen yuffsen s wagra!...

Jeddi indep d henna Tapnuft zeg ufuss nnes, issenyi t xef tbarda n tsardunt, yenna s:

- “Abrid nnegh d ansa u gha war yedji unfarar, ndep ghar mani mma twarid tifawin xef tmewwa n izvughar, zzat ma ad anegh d idvfar Umarzuq d rwacun nnes ad anegh nettyen deg undvel n tesraft i nucar d reowetc i tarewra nnegh”.

Tasraft tetwacar, Bezzah yarwer, teqqim tewwart n tezrift tesbixix, tayennurt tecca ighghedv n tmessi nnes, ijajjen n uxxam temsawadven jar ayawya nsen s tutlayt n utvebpet, ffghen d am ixedmiyyen deg wul n ca n arrimet temmexs aghimi nnes jar lazv d tyawant n tesrafin.

Di tuffut n wass nni; isbuori wi isghuyyen xef tukkardva n yarden, maca attvas ggin ghezzu di lwacun n Umarzuq, wami adan nsen temghezzan s lazv, agra nsen itwanti ghar wazzay n taddart!.

Jeddi Bezzap iccat s teghgharct nnes taqsuhi n ucar ifezzaren s tzawa; itleplip s tumart am wenni i yuffin txabit n wedrim, afuss nnidven iccat zzay s di zoenquq n tsardunt huma ad tefsus di ticri nnes.

Tennas henna i yettfen di svrimet huma war zzay s tnejfir ghar unedref:

- Ghar mani netgaj a Bezzah, aqqa tacigh iked uyenni itazzel xaf negh, maca acar nnegh isriwriwe d ghar negh, war yesxi ad nemutti?

- Negh taycint deg ixf nnem, mermi mma teggid asvurif ghar zzat ofess xef wul nnem, rebzv it huma war itghimi iddar jar takkayt nnem!...

Teddu; tesriwriw i mkur afruri d itgarrao usvurif ghar tawada nnes, teccat deg wadjun n wadvu asvemmadv izzelfen udem nsen izzuyten ijj n imal d amaynu, yenna s jeddi deg idv nni n uskuti di yesummet ict n txancet n yarden:

- Imal nnegh iweddar jar tibadutin n dcar, neffegh d ad xaf s narzu mani nnidven, mani war nessin!...

Iswedv di tmughri n temghart nnes, yuffi t tarekkwes rxezrat deg usqar n itran n ujenna, yareqqen jar tittvawin nnes, am wareqriqen n waman i tugha d itnessisen ijj n wass zi “tara n trussi” i yedjfen s ughir i waman nnes; tedjef ura i jeddi d henna...

- Di mindi txarrasve d a Tapnuft inu?

- Deg ass n udwal ghar dcar nnegh, akud di gha d smunen lwacun n Umarzuq ayt n uxxam; ad barrhen xef tadewla n Bezzah aceffar!.

Iked usfarnen, yiwyi t unudem jar twizext n tidet d tenni n tarja, amarret n webrid issizgh it zeg idvaren nnes i yudvnen s ticri.

Deg umnadv n tmazirt n Lgherb; mani i yiwedv, tibehhar n Ufasi msedjaoent; ssunt d agra; am tidekwanin n jennet; refrug n tayyutin dlin iyran nni ugha war yedji ufray, taryiwin n waman tazlent am ifighran xef tifednin n imezdagh, xef idvaren n henna d Jeddi d tsardunt nsen, uylent ghar udmawen n kradv idsen timitar n zzeldv d tinfas n uneoreq d uxeyyeq, Afasi issen ira usin d zi arrif, zi tmurt n lazv...

Yeksi d henna di turvut n ufuss nnes am waman drust, isghim itt di tiri; tusmin n jeddi war jjint tamghart nnes ad tadeff amadval n tawuri, netta ittar zeg Ufasi, ad imjar nigh ad icarez, huma ad yarzu xef ughraw zi ghar issenta imal nsen.

Afasi isgha xaf s tasardunt d min d as icetten n yarden, ittar ad xaf s isegh ura d henna Tapnuft, maca ikkar d zi tarja nnes itarjiji itemzawar; iteghzzaz tighmest s ufeqqeh; itmengha, yarezzu xef uxedmi zi ghar inegh amcum nni n Ufasi, yeqqar i henna u nettat war tessin min tid icqan deg idv nni n tayyut:

- Ewa d ayenni i dayi itghiman rexxu, mara war iwyegh i babas tamennawat ad taff nec war djigh d Bezzah, yarezu ad xaf i isegh min war itmenzin; arri n ugarrem yexs ad cem yarr ghar s d tayya!...

Tapnuft tewca s ad isu aman zi ghar issexsi tarjin n isefdvawen n tarja nnes, di war yesxi ad yacar tayri nni waxxa war yedji deg usayes n tidet.

Nec i ytzemmamen tanfust a; righ ad awem inigh, sin n ineghmisen zi tmeddurt a:

- “Itcettih wenni yennan jeddi d aceffar, maca itwacar, tcemtit raxart assegwass n 1934, hedd yeqqar yiwyit ayl n Tanja, hedd yenna tennujud ghar s tmettant deg idvesv wami tugha i tarja min xaf s urigh, jar ta d ttin; dinni ict n tidet; d anfarar n ict n taryazt d ijj n umezruy.

Henna tezvguttvi day s tewsar, immexsit usvurif uca tewdva!.. tarni ticti ghar tiyyita nni day s d abarru, teqqim tcett; tmuttuy zi rectu ya ghar win, yudven ighess nnes, tedjef i ticri nnes, rexxu; aqqet d tarzift jar ifassen n wakuc, d yenni n yedjis”.

( Said BELGHARBI, amazigh31@hotmail.com)

 

 

 

Copyright 2002 Tawiza. All rights reserved.