uïïun  173, 

tzayur 2961

  (Septembre  2011)

Amezwaru

 (Page d'accueil) 

Tamazight

is d talmmiççt i wanay vur zzat niv d asulf i wavul dffir?

Arrif di 122 n iseggusa

Nustaljya

Adfur n tmzvla, timdyazin n ben zrwal

Kartvaj

Akwttay

Français

A propos de la construction identitaire

La nouvelle constitution

De la guerre de Jugurtha

Adrar Neffussa libéré

Le VI ème congrès aura lieu en Tunisie

العربية

ترسيم الأمازيغية: فرصة للتقدم أم مناسبة للتراجع؟

سؤال الثقافة الأمازيغية

مقاطعة اللغة العربية

أصول المحاكمات الأمازيغية

في ذكرى رحيل سعيد سيفاو

تجسيد العروبة وأشياء أخرى

الاستعمال العبثي للأمازيغية بالقناة الثامنة

بوكوس يهدد عصيد بفصله من المعهد

تكريم المخرج عبد العزيز أوسايح

حروف تيفيناغ على علب الأدوية

أرضية العمل الأمازيغي

صدور المعجم الإسباني الأمازيغي

الدورة السادسة للمخيم الوطني للامريك

إعلان طنجة

تعزية في وفاة الدكتور لحسن لوداوي

 

 

 

Tanfust:

Nustaljya1

Yura t: Said BELGHARBI

 

Tsammart dg usqif n uxxam tesusef d tiri nns xf ict n tjartitc n tizdvent, snat n tejdvidvin temsazzarnt dg wadvu xf tyawya nsnt, tirarnt jar tifray n ijj n urtu ighmi d di tiriwet n lemrah, temhizwarent jar asnt am tmezvyanin xf twafitin d habut n teorurin.

Zeghdud itemqetmar ikd usmuqqel nns i di issenta uswadv ixssi, tewsar teghza tezrudduh days, tesencir di arrimet nns yufren s imenghan ikd imenghan.

Isareh idvarn nns xf tjartitc, ikkes d aghbar2; yarzvem asafes i txubay n ighanimen, tiri n usqif tmuttuy; netta irehhem akids, huma war t teccit tfuct dg uzllif; ad as tawi aynni n jjuret n uxarrsv i zi ixs ad issen min war issin, tifray jar ifassen nns qtvutvsvnet s wattvasv n uhadi d udvfas, innuhmez; iragha xf tmettvudvt nns ghar ujemmadvin n usqif:

- Awi d akidm tismuqqal3 inu, aqqa yent uylent ghar ujij n texxamt n yidvesv.

S lebput teffegh d Traytmas tfarren ticri n isvuraf nns; tesoa tiggaz n wazli xf tenyart nns mani temraywan imgharvsven n tsebnit i teqqen xf lmepdvur nns, teqqim zzat i Zeghdud; tenna as s wawal i di isdel uzawar:

- Teksid tamghrvusvt nni n tifrt4, gwar ad teqtvutvesv jar ifassen nnc, siggwaj xafk tarja nni, arr taynit; aqqa raxart ttarem xaf ngh tifit5; ck texsd ad tarred min immuten.

Isvwedv days s tismuqqal nni; issusem; dg usqar nns axmi ixs ad yini:

- Ura d neccin ghar negh tasghart di tudart, lekfen war illi d arudv inu wapa, marrva midden ad tarsn xf ilmawen nsn, raxart war telli tessen ansa6 n Zeghdud wapa!.

Traytmas ikd waryaz nns qqimen assa dg ammas n tawja7 am igujilen, d wa d azref n tudart, lwacun itemsebdva, ijjn war itghimi ikd unnidven.

Zegga t yucar ususem ghar uraq nns, idwel d ghar ixf nns, inna as i Traytmas:

- Nnigh am… cm teswingimed wami tugha jeddi iccarrez iyyar nni!?

- A wap, zzat ma ad immet tugha itezzu t marrva d yarden, axmi nni d itawedv i razagh itghul8 iyyar ireqq axmi d isseghmi iyemmumen n tfawin; tugha itissiq am waregh jar tittvawin nngh neccin timehtac, min ck yughin, manawya idvennadvt oad!!…

- Amcum nni n lqayed inna ayi ira tifrt nni war ck ttiwi ghar ca, war days bu uzwel n jeddec, maca days ansa9 n usayes, dg akud nni tugha war tzemmimen ameddur n ayt bab n tmurt. Cm war twirid yan iddar; issen jeddi; ad kid ngh ibedd; “Toinict” nettat ghar yiri tessen!?.

Tesfartq10 Traytmas s min teoram n tumart11, ar mani d issijjen t aynni n taghmuzin i das itghiman dg uqemmum, tewta s tubudvin itwaxemren zi temzvi nns xf uorur n Zeghdud, tnna as:

- Igga ac arebbi rebyadv ahnini inu, tenghid ayi annoiyya, tugha itghir ayi assa tarwer zzayi tadvsa12, “Toinict” war tessin ixf nns ad tessen tidegwanin n jeddec i ccint tkeccawin wapli.

- Maghar min tt yughin?

- Zegga tmmexs mmis, teks it ghars illis ad tesyem tewsar nns, days rattvan n tattut, yarwer zzays uxarresv war tessin azellif zg idvaren nns.

Zeghdud dg ul nns tisegnit13, s unezgum idewl war issin ixf nns mani oad imezdagh n dcar, tarwa nns s iwetman d tutmin iswi14 nsn ad ittu iyyar nni, uxf icca tizemmar nns, ssnen ira min itg amnni war t issufugh ghar ca, unni itmenghan ikd udrar min zzays ghar yawi, rmxzn oemmars ad tyarna yan!.

Innufser d uxarresv zi twangimt n Zeghdud am unpam n wassam, itnedraf zzays wawal, inedder zzays ghar uweddar n uswingem nns… itaghed aghemmuy n umnus nns d refrug n iwalen d icetcan umi yarezzu tiwafitin.

Tidet n tarezzimin15 nns trabaoent d adaf d ufugh s ticedvyin n waregh zg ul nns ghar ul n iyyar uxf icca bunarjuf.

Aswingem n Zeghdud iqqim d ayujir jar ixemmimen, jar ixfawen t ikesin d aseqsi:

- Mayemmi ghar neddar ammu am uzalim16 war n sekwi walu?

Iqqim uswingem nni itmuttuy ssa d ssipa, itennedv xf uzellif nns; am ict n tfaredjset tehrara mani ghar tesdel asartu nns, tesmuqqel days Traytmas tenna as d nettat tesitim ad tessen min itemxtwayen n ixemmimen dg ugayyu17 n waryaz nns:

- Ma trid ca n ughellay n reqpwa?

- Wap, aqqa tacigh ikd izvuran n uzellif inu gwar ad nnufeslen zg idughar nsn.

- D ck ixsen, tesghezzud dg ixf nnc.

Tesmun ibehrar n rizar nns, tekkar tsnenned taghellayt, issenta isessit s uzughmet; tasekkift awarni utcmas, wami iggenfa, inna as:

- Nnigh am.. ura d baba ad t irhem arbbi war iggi s wawal inu, nnigh as gg as azal i umessuci nni, maca war ghari isri!.

- Babac waxxa tugha itexs tamurt nns maca tugha issen ira tudart d taqudvadvt! pa rxxu immut ijji t marrva awarn as.

War ixes ad xafs yar, itaf awar nns imsarwas, war izemmar ad tt id yar ghar ubrid nns, isvwedv ghar arvadvyu, issuyar areqqas ghar isallen18 imaynuten:

(Mass Lberdaoi issigwed tamcumt nni n Iran, inna as mara war xafm teksed zvmar nni n luranyum ghar tzubayt, ad zzaym d ndaregh zzekt!... Lqeddafi aselway n Libya ihennedv iselpamen nns, inna asn dg usqamu19 n tmunt n uoraben: aqqa tekkim angh dg imezzughen, teprim angh s ca war illi, dvfaret ayi nc, ghari adellis azegza days asafar20 n marrva timukrisin n umadval… Mass “Omar n Musa” ixeyyeq zg umeddur n udayen, iwta xf tadabut21 n usqamu n tmunt n waoraben, ittar zzaysn ad munen ad ggen afuss dg ufuss ad kidsen qdvoen tighuni).

Traytmas tufa war tecni i yan nnoiya, tettar zzays ad ismutti areqqas ghar tmurt n Pulanda, texs ad tessen mmis min di illa, attvasv war d isseqsi.

- Arvadvyuya itettvef d mghar Arvbatv d Dzayar, cm zzaym asekki n idrimen war illi d amnus n Muhend nnem, twarid ayura iodver xafm remqddem war d yiwi lmanda!.

Muhend issekka d aynni n tcemmust n iqarvidven i ymawlan22 nns di mkur ixf n uyur, twara ta iodver war d isseqsi, ad yiri tuss d tebrat teqqim ghar umcum nni n lemqddem n dcar, dima itggi t; war ibettvi tibratin n imezdagh huma iseki tent xf refqip n temzida ad tent ighar.

Umi d aqubbani war issin ad ifsi isekkiln d ihennicen n tira min xafs icedden tawuri ghar rmexzen! maca itoini rmexzen d ta d tasertit23 nns itexs inni war ighrin.

Idwel refqip issen marrva umi d sqadan tarwa nsn, axmi d tadef n ghar temzida, ad twarid mghar issawal s timitar24, itawi itarra dg wawal: (maolik war telli d Julyana tiri ingha baba twm bupyyuf; tegga awm ijeyman n isemghan ad xafsn teddzm arri, iwa unni umi war d ttaoni Julyana tejjim t ad issisen ireqwaz n lazv di tzvewdviwin n leodes)

Yudes refqip ghar usqamu n imezdagh, mani tugha i temsawalen jar asn xf tghawsiwin n dcar d umadval d imenghan di tmazirt n Loiraq ikd Umarikan, wami nfararen, inna asn refqip:

- Marrva min teqqarem jar awm war d angh icqi di ca, nc ghari ijj n uneghmis d amaynu.

Issiwel d Zeghdud jar imesghimiten, yarra inna as:

- Gg tacmamt; teqqned xaf ngh ajeqqmim nnc, aneghmis nnc qqen ghars aghyul nnc, war illi d ck i t id yiwyen, ad yiri n remqddem amddukel nnc, ma ck oad war tesvurf d tabadut n temzida zg wami d trured.

- Iwa d ck iffghen a Mmuh; iymiren25 nnc d ssuq!!

- Nc rexxu usaregh; udem inu tecci t tcuri, tittvawin xesyent, ticri inu tudven, di temzvi inu tugha ccarq war xafs teggegh, arrigh t yudes am ragwaj n uxxam inu ghar temzida.

- Iqqim dayk mghar ils iteqqes am jeghdid26 n uzlem27!

Ssiwlen d ayt bab n temzida, ttaren zi refqip ad asn yini aneghmis nni ixsen ad awdven.

- Iyyar n tidrin ufin days wargh, arezzun di radas d yusin ad qqazen akal nns!.

Ikkar usafu28 n tmessi dg ul n Zeghdud, mri das nnan Muhend nnc immut iri yus as d uneghmis axmi d walu, nigh mri ittvesv ikkar d ghar tuffut yufa tittvawin nns ddareghrent ura mri isra awal nni amarzag, ikkar yuyar; iffegh zi tewwart n temzida am ufugh n texfift zi tqemmumt n mawsa, ioref iggur iteghzvazv tighmest, azellif nns itaca akids yargha am tixfet n zvalamitv, ifsi arezzet i tugha innedv; indarit xf teghrudvt, mri yufa iri ismurdves zzays marrva inni umi inna ixf nsn ad adfen affray n tmurt nns s nebla aseqsi d usnuwji.

Imezdagh n dcar marrva ssnen tamacaput n Zeghdud, maca war twilin lehmala29 nni dinni dg wul i tmurt nns.

Imutti uneghmis n iyyar jar ilsawen n imezdagh, am wudvuf n tmessi dg umettvar i yufin razagh dg ammas n unedvrar.

*****

Ijj n usutar war ghars umas, wargh tugha ojjnen xafs s ihuras nsn; tetvsven xafs… nitni war ucin, ssemlilihen anzvar ad inegh tzawa; nitni acar nsn d llwiz, trajan ghar idrimen n Julyana nitni tamurt nsn d anuten n waregh…

Anessis n usutar issenta ad yudum, asfarnen isdel xf udmawen nsn, amezruy n iyyar n tidrin mechal d isseghmi n tzizawin30; rexxu ad issfuffi s imal n waregh, ssutaren ad ajjwen iqebbuzn d tixuncay n idrimen, awtem d tawtemt; mkur ijjn d tarja nns, arezzun ad fghen zg ixemrawen n lazv nsn.

Ikcem Zeghdud ghar uxxam istextux; itnenna am zzekt xf ubarejju31 n tmessi; ithennadv taghghayt nns zelmedv d iffus; itmengha, itekwar daysn:

- Tarwa n teydit… wellap ya babatsen i ma ad ten jjegh ad dinni uyaren asvurif ayujir, wellap huma qazegh dinni imedvran nsn, i tarwa n tajjalt…

- Min ck yughin, d min ck isxeyqen?

- Uffin days waregh; itghir am mayemmi xafs tghughuden amenni, maca waregh n tidet d idammen nsn i dinni ghar ssizlegh s ifassn inu!!.

- Sqqar a hnini inu, min ghar tegged amnni, war tzemmared ad tisid ura d ifadden nnc oad ad tawyed tamennawt i rmexzen, tamellalt rexxu tarza c jar ifassen!.

Igga afuss xf ul nns, ihuf ghar tisi n usqif, tuzzer d ghars Traytmas, tuyem d ict n turutv n waman zg uqbuc, tbeqqedv zzays udem nns, maca deghya isseghri tallin32 nns, yugi ad innuhmez, ura ad yar xf iseqsiten n min tid icqan.

Ict n tghuyyit i tegga, war texs ad twara aryaz nns s taqsuhi d tirugza33 nns zi itwassen; rxxu ad idwl am usymi jar ifassen nns.

Udfen d xafs, ufin tegga s afuss ghar ul, txezzar ma ireddu am urtax n umezwar, teksi d afuss tarri t ghar tinzar txezzar iman nns ma iddar.

Zeghdud yugnu; idwl d ayujil n wawal, smutyen d arrimt nns ghar tjartitc n usqif, itoini mmarenyen xafs izumal, ammu ighrin di tittvawin nns inni ghars d yusin, ma n utarras umi ghar itwacar wagra nns uca ad iqqim iddar!.

Issenta dcar itissiq di tittvawin n imezdagh, dg imal nsn, marrva zvwan ghar iyyar n tidrin, izvra nns mdvareyyacen ssa d ssipa, axmi nni tugha tn ithada yan, yarzzu ma war itif jar asn xf ca n uzvru n waregh ad zzays issenta takessit.

Rfqip ura d netta ikesi ijj n usirem dg ugensu34 nns, asutar nns d anaruz35 ad nnurezvment tiwwura i dcar, ad itwassen zegga tugha itwattu, ad teqqnen ghar isenfaren36 n tanukra...

Tarja n refqip teffulki, ad texsen marrva inni ghar yuza uraji, mghar Zeghdud mri ghars tizemmar uca isra ghars iri yuri d akids s teghghayt ghar ijiyman, maca walu tiseqdar.

Imezdagh tekkaren zik, tghiman ghar tbadutin n tudrin d timewwa n ibriden nsn, trajan ass di ghar d isugg rmexzen s “parrvamat” nns ad qazen iyyar, axmi d ghar isfuffi s ul n waregh, ad mhizwaren ad ccurn isvunaj d txanciwin nsn.

Amenghi n Umarikan ikd Loiraq aqqa war das yarri yan taynit, Amarikan d amcum issen maymmi itmengha, yarezzu ad yarna huma ad yayem anuten n waregh abarcan, “Sveddam” ura d ntta d amcum days tighennanin, war tyjji ad yayem mammec ixs, akuc axmi nni itaf iselwayen37 n tmizar ggin accawen, uca iccat amcum s umcum, ar tarennawt38, amenghi sennej i tmurt war itenfirir.

Waregh d unni d aluf39 n imenghana, marrva timura di illa wagra daysnt imcubbac, tinni di war illi ca twattunt. Amenghi di dcar issenta ikd Zeghdud d rmexzen.

Zegga d iwdva yudven, issijj d xafs remqeddem, yufi t immarni xafs rattvan, itemqetmar ad yini; maca itmetta days wawar jar wancucen zzat ma d irur d amenghi.

Isvwedv days remqeddem s rxezrat n uzillez, inna as:

- Muhend nnc issek ac d lmanda, ttar akids s tcuni.

Tettvfi t Traytmas, tedvfs rcighed nns, tudef ghar jaj40 n uxxam txemr it jar icemsan, Zeghdud itirar s wancucen nns, itemsawal s idvewdvan, waxxa war issiwil maca ssnen min ixs ad yini, yarra xafs remqeddem:

- Azref41 n unbadv42 d wa d netta, waregh d agra n marrva imezdagh, war illi nnk wapa uca ad xafs tudvnedv…

Maca, netta aswingem nns yiriw, tughi t tyarzawt xf ucar nns itwacaren jar tittvawin nns, uyak ghars tasghart ad iru xf wagra nns, ad xafs iprec, ad xafs immt, nitni qqarn d agra nsn marrva; manis d ikka nsn, ma ghar marrva min ghar sn d igrwan ticcn angh zzaysn ca, agra mara war ghark illi jar tighmas d affaz43, tssghrayt ghar uoddis nnc war das qqar oemmars inu!!.

Waxxa yiwi yarra jar ixxamen n rfusinat, azref n rmexzen imxumbel; igga am twafitin; war ttif d tawwart zi daysnt ghar tkecmed, manis mma tudfed ad tafed traja ck dinni tewwart d tamaynut; ck ad tarezmed asarraw nns ad tafed ictn nnidven, war qettvint, war tenfirirent.

*****

Ul n tmurt marrva d igerwan, maca udem nns marrva d izendaren, d acemcah am tifraz n imezdagh nns, marrva d adiqqi, axeyyeq war illi zi ca, maca zi mayemmi war tarrin mezri i mezri nsn.

Ahewwas arvumi, dg umezruy nns abarkan, dg Udrar n Iksan ighza tamurt, yuym d zzays iqendarven n icaren n wuzzar, yuyel iriyzam ghar ifassen n imezdagh, qazen imedvlan i ixf nsn; tacaren agra nsn, ghar umeggaru arvumi igga imal nns s wagra nni, nitni qqimen d imeodvar; d imeprac, rmessus n arpaj itetvedv zi arrimet nsn mammec icca Buyjarwan agra n Udrar n iksan!.

Ass a iqdva uzzar dg ugensu n ifran nni, tetwattu tmurt, qqiment tmitar n umarret ddarent, udem n tmurt ibbarcen am umzruy nns.

Ameddur n uhewwas imsarwas ikd unni n rmexzen, axmi nni d twansaren zg ict n tinzar, urawen nsn d uzzar; d uffar, tamdint n “Jrada” adaf days d arubi, amsebrid days igwaren itaca aqqet di ca n udghar war ghars bu tefraz, wami infarar usenfar44 n ccarbun zg ifran nns, djfen imswuriyen45 i tawuri nsn, slazven tarwa nsn, nghin imal nsn...

Itoini d manawya uxf ittru Zeghdud, imezdagh war ugzun i azal46 n imettvawen nns, ittru xafsn nitni tghiren xf dhur nns, maca itghima umettva d ijjn, trud xf ixf nnc nigh xf yan nnidven, imettvawen war d tarrin tasrit mara temrec nigh d amttin mara indver.

Traytmas di “lbucta”, teksi d iqarridven nni, teskuttvef d zzaysn cwayt n iduruten; tewci ten i remqeddem i das ifkan afuss n tawiza, minzi lmanda tuss d xf uzwel n Zeghdud, mri war telli d tissent nni i das tgga dg ifassen tiri war d tkessi walu, tinnidven tegga snt axemmer dg uhsin nns, tettar zi bab n “lbucta” ad as ikwet atriffun ghar mmis:

- Alu! tanmirt a mmi xf usekki nnc, maca arezzugh ad ac inigh ira babac yudven attvasv, uyar d ad xafs tesijjed, war tessin d bab n tiwcca!.

Muhend issen ira babas ur nns yuyel s tayri ghar tmurt nns am marrva irifiyen n zic, issen ira iyyar n tidrin tugha t ghars d ughris47, war illi zg wami days ufin agra, mri days ufin ifighghran iteqqsen iri ixs it, akal nni mani uyaren inuba nns; ad dinni isvuref ura d netta am nitni, maca itwacmet, min ghar igg izmar jar tirarin n uccanen!!!

Yuss d ad indver babas, iks it jar ifassen n imezdagh d alghugh48, jar tfugla49 n trewriwin, yiwi t ad issummet acar n uskuti50. Zeghdud immut, ijj d tamacaput51 teddar, teccur s timitar, d usutar n tayri…

Tamurt n Pulanda war telli ca am wammu, agra nns bettvant ayt bab nns jar asn, tetten akidsn ura d inni n midden, mkur ijjn ikessi tasghart nns.

Izvwa Muhend ghar iyyar n tidrin ad xafs igg asijji, ad ixzar mani days tiwedv tawuri, yufa ggin as afray s iymirn52 n uzzaren, war ghark manis d ghar tekked am ukermu n Tazmammart, tiharyadvin n toejjajin d tiwraghin, “parrvamat” soant53 iqemmumen qedvoen am tgharedvmiwin, zeoofent dg ucar axmi nni tetten t dg ul n babas, teksent id tisvudvar; srusant dg ioeddisn n ikamiyyuten, smuttuyen senni idurar n icarn, idwel iyyar istextux s tawuri, amussu dg udghar nns am teghrasvt n tzizwa; tamment walu!.

Ibriden hemren s ikamiyyuten, ad tinid axmi temhizwaren ad nnghen tifraz i dcar, ad tejjen d aqeccar n wudem.

Imezdagh oad ttvfen dg usghun n unaruz, oad qqimen ghar tnebdatin n tudrin; d timewwa n ibriden nsn, tarja nsn ad yudum unzar s idrimen, mermi mma ikked ca n ukamiyyun ad asen issarbu tioejjajin ghar ulawen nsn.

Tayarzawt tugha mani war ttigh, mri fkan54 afuss i Zeghdud di tudart nns; mri kides swizan xf imenghan nns; mri arrin taynit i iyyar, iri assa war iteffgh ifassen nsn.

Attvasv n tebridin iten itrajan ad awdven ghar iswi55 nsn, Fas war tsekki56 dg ijj n wass, itxessa tawuri; d uswizi d umezday jar asn, atagh ad kkaren ca n tuffut ad afen tiyazidvin nsn sdalent xf tmellalin n waregh.

Muhend yarwes rxezrat nns dg umuzzar57 n “parrvamat” nni sarvdvent agra n inuba nns, isvwedv xf ughezdis nns itwala ict n tarbat; tarxu i ucewwaf; tesfarnin s ughir, tettvef “mikruffun”, tnna as s usqsi:

- Ncnin zi telfaza n Arvbatv, nuss d ad ngg ijj n uruburtaj xf usenfar58 n waregh di dcar nwm, nesitim zzayk ad kidnegh teswizid s wawal nnc…

- Nc zg imezdagh n dcar, d ta d tamurt inu, nettu ayawya nngh, maca dinni tayri jar angh, snimiregh s wattvasv i akuc xf tarzift nns idanegh d iwarda, d tanmirt temghar i rmexzen dangh t ihewsen, mri dangh t ijja iri netca xafs ayawya nngh, iri tufi d dg udghar n waregh tinedwin n idammen!..

Tmutti mujettvuy nni, tezri s ughirin ghar innidven ad tn tesseqsa, Muhend issen ira awal nns war ghars araq di telfaza, nigh mara iodud ad ikk buseyyar; ad yifif ad izwi ad inghed ad ifegh d azyen, maghar marrva min itwannan itefegh d di telfaza! war illi ca am Pulanda; min ghark dg ur aqqt ghark xf yirs; aqqt ghark di telfaza, war dac itegg ura d ijjn isekraf59 nigh abulis ghar uxarresv nnc, issen ira aruburtaj ad issiwel xf tcuni n usenfar, d usemghar zzays, amenni nnit, iraja isallen.

Aneghmis amedvlan:

- Axfif isriwriw di tmazirt n Loiraq, teduqqez ict n rmaynat di temzida mani tzallan icioiyyen, yiwi akids imettinen d wattvasv n ineyzam, maca war issin yan ayt bab n usduqqez nni ghar rxxu.

Aneghmis n tussna:

- Di jjutviya tamdvlant, mani tmenzant tghawsiwin timenza ghar illa wazal imgharen, imsegh s wattvasv n iqarvidven ijj n uqarsvusviyu n tnazurt “Svuffya Lurvin”, inni t izzenzen nnan ira tajjut n tidi nns oad aqqet di lkettan n uqarsvusviyu nni, s minzi ighra anict uyenni.

Aneghmis anamur:

- Ad kenniw nesides ghar ijj n usenfar, Lmeghrib amaynu yiwedv ad ikkes waregh zi tmurt nns, mani nnurezment bapra n tewwura n tawuri iyoerrimen nngh, ad kenniw nejj ikd wawal n Muhend illan d amezdugh n dcar:

- … “D ta d tamurt inu, nettu ayawya nngh, maca dinni tayri jar angh, snimiregh akuc s wattvasv xf tarzift nns idangh d iwarda”.

Qdvan ineghmisn, infarar wawal n tkerkas60, tiwecca zic ad tiyyar tfuct xf Lmeghrib amaynu! Traytmas tezra mmis issawal di tribizyun, waxxa tnnuri, tettu tiqqest tejja tmettant d ayezzum dg ur nns, waxxa teqqim d tajjalt; maca ghars Muhend nns d anaruz, txarresv ad kids tmun ghar Pulanda, war das itghimi min ghar tegg jar ususem n dcar.

*****

Maymmi a tudart gharem ur iqqseh d arvumi!! Amarret yujar tiddi nnm… ghar umeggaru ad teqqim Traytmas d tayujilt, maca dinni abrid n “fiza”, ad zzays tennuwju ghar mmis, ad kids teddar ayenni n ussan itghiman dg umarwasv n buhbel nns.

Muhend issarjij agayyu61 nns, ixs ad issezvwa immas, yarra inna as:

- Maca tamurt nni n ujris d tayyut, dghya ad days txeyyqed..

- Maolic a mmi, mara aqqayi zzat nnc oemmars ad udvnegh.

Muhend war issin manis i ghar issenta, ma ura d netta ad idvfar tabridt n babas, ad yarzu xf tesghart nsn; ad tid ikkes jar accaren d iqemmumen n isvidven, mhizwaren ixarrisven di twangimt nns, yufa ixf nns yuyel jar ujenna d tmurt, dg ammas n taylalt62 i temraywan xf tseffay n tayyut n Pulanda.

*****

Tamurt ul nns d waregh, ayt bab nns tgajen d isemghan ghar midden, maolik d ghar dewlen marrva imennejra ad ssemgharen s tgherma63 nsn, ad tedwel tudart ghar uxxam i tugha yaredren, ad isfuffi umessuci s ughmmuy n buzziyzu, ad tedwel tudart ghar raxart!!..

Maca mani illa wi t ghar iggen?!.

Tarrawat nsn tamezvyant axmi kidsn temsawalen ayt bab n dcar, temseqsan:

Min illan yiff64 attvasv ghark, d arif nigh d Pulanda?

S tmelsa65 n temzvi nsn; tarran d xf iseqsiten; nebla axarresv:

- D Pulanda!

- Mayemmi!?

- War dinni bu izvra n unedref, ura d tizubayin, ujar zi manawya Marruku days attvasv n ibupaliyen…

D imzvyanen war xafsn itigh yan; d iqudvadven n uswingem, maca qqaren tidet itwalan, arif days izvra days ibupariyen d tzubayin, maghar tella ca n tmazirt war days manawya, war ssinen ira izvra n arif assa dewlen d waregh, war ssinen ira mani llant tzubayin dinni tyawant, ira mani llan imezdagh dinni ura d ibupariyn, ira mani tella tibuprya dinni tighit.

Maca temmarni xf imezdagh, tugha tghima mghar Traytmas s tighit nns, rxxu tebbupli, wami dhant ura d tiwessura arezunt ufugh.

Tiwedv ghar temdint n “Umsterdem”, s ibehrar nns; war tessin ad zzaysn tuyar, tamurt d ujenna marrva d tifawin, areqqent xesynt am isefdvawen n itran, itghir as d ca n tfaska66 twag di temdint, nigh d mmis isemgharen s twasit ghars.

Tekcm ghar taddart, sriwerwent ayt n uxxam, nettat tettvbpet, txezzar attvasv; tssawal drust, axmi nni d tugha tyarzawt xf buhbel nni issewsar zzman deghya jar izeghran d ighezran n dcar, axmi nni tugha tyarzawt n mayemmi war d tezvwi d tamezvyant, ura d nettat ad tekkes ca xf ul nns; ad tarr imezran ikd Zeghdud; ad kids tirar jar tfawin, ad ggen afuss dg ufuss; ad qqasen zi tazvyudvi n tqemmumin; a das iwarda ajedig67 mammec i tezra teggen ayt bab n tmurta, tisvudvumin di Pulanda war xafsnt bu ufray, svudvem mermi mma texsed d mani mma trid.

Maca amuddu di tudart d aqudvadv; deghya itenfarar, deghya itejja temzvi ghar tcarmin, itawid akides tewsar, mani iqettva usitem; itazvegh am inessisen di tariwin.

Tezdegh di tayyut; dg udfel; d unzar; d ujris… tezdegh ura di rhesvran, mermi mma temmutti dg uxxam taca axmi tella di ca n tkurmut68, axxam nns di arif anict n wanict, itara mezri i tudart, asqif nns iqqim d anedvrar i tirarin n tejdvidvin t yufin d adghar n ufra i tmughzarin nsnt.

Tudart n imnneoraq d aghufi, Traytmas ibedd d akids wawar n mmis, maca tghufit n tidet axmi nni d taf war das itarri taynit, tesmunit xafs tawuri, ayyawen mkur ijjn d amadval nns, ijjn war issin unnidven waxxa d awmaten n ijj n uoeddis, taddart n lwacun maca axmi nni tzedghen imsebriden, ura d amsawadv jar asn dg uxxam d asvemmadv s tutlayt n tpulandit.

Ayyaw nns amenzu itwakref; rmexzen Apulandi yufa ghars icemsan n rkif d lkukayin, ayyaw nnidven imrek ikd trvumit; ijjed akids snat n tarbatin, iteddar am urvumi, tayyawin awal nsnt xf uttunen n tumubilat d warudv n mudva, ksent taqcurt; axmi nni daysnt ghar texzared ad tghired am tinni iznuzant aksum nsnt dg iqwiren i wi yufint.

Rexxu tessen tidet n umeddur nsn, d mayemmi ttun arif, ttun ura d tifraz nsn, d mayemmi tamurt n tazwagt tett ayt bab nns!.

*****

Umi tejjim arif nwm, dewret ghar ixf nwm, aqqa izmar mara iffegh ulli nns deghya ad itwac jar uccanen, umi tejjim ixxamen nwm; tiseklutin69 nwm; timzidawin nwm; ibupariyen nwm…

Arrif izzuyyet70 tarwa nns, izzuyyet aghimi akidsen ghar tfawt n tziri, ad asn yini taycitin nns; isutar nns; tinfas n icetcan nns…

Ad asn yini xf tiqqest ughezdvis nns, dg iyyar mani t tqazen s iriyzam, idammen nns swinten war dasen jjin ura d asekkif...

Tamurt n tazwagt war tkessi iwezwizen nsn, teddaren tmettan am imsebriden rebda itghima daysn laz n uzddugh71 nni.

Traytmas yargha days uynni wami tesra ghar ubarrah itsvudv di jajj n ul nns, tnna as di tuffut nni tasvemadvt i mmis:

- Arrayi rexxu manis dayi d tiwyed, tnedvrem ayi akidwem am n ddargh, upu! war da arennyegh asvurif, tesrigh as itragha d xafi, war zemmaregh ad qqimegh war ghars tmurudegh, days i ghar mmtegh..

Ul nns sixenta oad iddar, d nettat yugzun i wazal n iraghan nni, mri iddar waryaz nns iri war t itejji ad tezvwa ghar midden n arif, maca immut.

Mmuten ura d ulawen n marrva inni war ittawan ikd irubiten nni, kradv n issegwussa i temmut di tayyut, wami ghar tessars tifednin nns xf ucar n arif, teksi ifassen ghar akuc, tnna as:

- War dac ttursegh walu, rexxu mara texsed ad dayi tawyed tamennawt, nghayi.

Tufa dcar yarrni ahuzi, kradv n issegwussa axmi nni d kradv n ussan, iyyar n tidrin yughel72 marrva d inuqqab, arrint d irimamen, rettxen days axmi nni ccaten s ixedmiyyen dg ul n Zeghdud, tufa dcar yuggi ad immutti ghar tfawin nni i tezra mani; ghar tgherma73 nni i tufa mani; ghar tqemmumin nni itezra mani, tufa arif oad itmurud xf ifadden nns, itnedraf, oad war irmid ticri am iqrinen nns.

Teqqunjer ghar undver n Zeghdud, tudar xafs, tsvudvmit s tayri axmi nni tesvudvum zg wancucen nns, wami d teksi udem, iccur uqemmum nns s ucar, war tesxi ad tessusef, tarrit ghar iles, tghezvit jar tighmas nns, tsgheryit s uzughmet ikd imetmi am tmezvyant iteghzazen tazvyudvi n tqaqqatin, tittvawin uymentid zg ul ijj n umettva iqrujjeod am udmam n waregh xf tgemmizin nns, yudum d itissiq xf undver, tessu zzays ul n Zeghdud yuggin ad yarca, maghar ulawen n waregh areccan!.

(Said BELGHARBI, Tafsut n Lkebdani 2011)

Tizmilin

1 Nostalgie

2 Archiver

3 Lunettes

4 Fiche

5 Linceul

6 Adresse

7 Famille

8 Devenir

9 Adresse

10 Le rire

11 Le bonheur

12 Le rire

13 Aiguille

14 Le but

15 Les solutions

16 L’oignon

17 La tête

18 Nouvelles

19 Le Conseil

20 Médicaments

21 Table

22 Les parents

23 Politique

24 Symboles

25 Frontières

26 Le venin

27 Serpent

28 La flamme

29 L’amour

30 Verdure

31 Les flammes

32 Les yeux

33 Courage

34 L’Intérieur

35 L’espoir

36 Les projets

37 Les chefs

38 Gagner

39 Problème

40 Intérieur

41 Loi

42 Gouvernement

43 Chique

44 Projet

45 Les ouvriers

46 La valeur

47 Sacre

48Champion

49 Le funéraille

50 Repos

51 Histoire

52 Frontières

53 Varsent

54 Donne

55 Le but

56 Construit

57 Sauvage

58 Projet

59 Les restrictions

60 Mensonges

61 La tête

62 Avion

63 Civilisation

64 Mieux

65 Innocence

66 Festival

67 Fleur

68 Prison

69 Les arbres

70 Longing

71 Stabilité

72 Devenir

73 Civilisation

 

 

 

 

Copyright 2002 Tawiza. All rights reserved.