Numéro  46, 

  (Février   2001)

Amezwaru

 (Page d'accueil) 

Tamazight

Mlmi d ghad twarrnt timura d "itwarrn"?

Tmzvi yttuzlan

Bu Jjanka

Bu tamja n Pamln

Iceddan

Iri cem inu

Tamara

Tamddit inu tzgar

Français

Almaghrib Alarabi, épithète ou qualificatif?

Particule de rapprochement "d" en tamazight

 

العربية

متى تسترجع الأراضي المسترجعة؟

ماسينيسا الأمازيغي في مشروع سينمائي عربي

خطاب الحركة الثقافية الأمازيغية

من أجل نضال أمازيغي متعدد الأبعاد

مقاربة أنتروبولوجية لنص شعري أمازيغي

 

 

 

Ungal:

Tamzvi yettuzlan

{Tafult taneggarut wis 9 (Neuvième et dernière partie)}

Yura dt: Muhemmed  Burhim           (Meknass)            

Ighrm axatar amzwaru nna ymghan gv ansa n tuyya d ixkijen n uzmmur, ighrm n yan ugraydvi axatar, cqi ykker wis sin d wis cradv… Toayd lhumt nnx d umazir nna aziza yyan ghas am ismdval s ighrman ixatar. Fransa waxxa tya i iosekriyn nns ighrman, tya pent mzzviyn, ghudan, tpeyya sen lbni, ku ighrm s urti nns, wid pap ksen tuyya d ixlijen, ksen amazi aziza d iydjuyn nns hmak ad bnun lowari n islliwen!

Nek d "RIKS" (mon chien) ur nufi mani da ad nlapa am mctid aya (comme avant). Nek d Bubi, ucix belli kuci tudart nnx tbrrem ur tqqimi am tin n mctid aya. Bba yumzv "Lantrit" zi loesker. Idrus unzvar. Icirran n lhumt xatren.

I ssekwila, da tawix tanqqit taxatart y taorabt. Ism inu ytwassen gher "Lmuoellimin" d "lmuoellimat" n taorabt! Nipni iojb asen lhal, ighuda sen lhal alli yix d aorab am nipni!

Zrin d wussan, ulix ghel "lkulij". Ufix yat tudart yadvnin, urid am ssekwila tamzwarut. Nmyafa nek d tussna tamaynut d yan uselmed yadvnin, din, ghrix as i MUSTVAFA LUTVFI  LMENFALUTVI, ghrix s ungal nns ighudan n "MAJDULIN D STIFENS", ungal ad iojbi yi bzzaf, zziy s ufix taghudi n ungal arummi. Nqqzegh gher tayzirt n wurgh, zzrix di s mcta n wussan, da tadjax imcli d imensi hmak ad ghrex aynna yjran i yat ugharrabu nna wi mi yngha fad n wurgh wulawen nsn. Ghrix dix ungal n "War axxm" (sans famille), iojbi yi dix awd nta.

Ufix belli tirra n ungal tmmezday ntat d umzruy n midden, ku yukt da tcemmal tan yadvnin am uryaz d tamttvudt! Ammas n tusna n irumiyn, rix bzzaf tnna n ayt Lalman (l'allemagne). Smi? Ayt Lallman cbbren i tusna nsn d tamazirt d umzruy nsn zi zik.

Yan wass, yca yi         yan umddukl inu yan ungal bela aghamis. Nnix as:

 -          Win mi?

 -          Ghas amzv t, ghri t, tddi d ad tssind matta nta d win mi.

Umzvx t, yix t y tackkert inu n ioesvekriyn. Alli nffegh zi lkulij, usix t s tazla ak ighrem nnx hmak ad sulax i tighri n ungal bela aghamis! Rzvemx t, ufix di s udem n yan uxatar n Ulimann "Adulf Pitlir", ungal ad ism ns s tlimanit "Mein Kampf". Ghrix t s uxzzun, iojbi yi bzzaf. Aryaz ad ur iyyi am irizen yadvnin, ysekker ddunit hmak ad yessezdi tmazirt nns, hmak ad yssili gher waflla tusna nns d tin imzwura nns. I dvart n lmut n "Pitlir" Lalliman txla, ttvubdva xef sin n imizar, d aynna yqqiman zi tiourrma tapitvupirt ysul yumzv y umur nns d tilelli n tmazirt nsn zi yfaxxen n "Lghul azeggûgh", imcinna, mcta n iorrimen n Lalliman ttunghan s lqertvas nghd ttiymzven y lehbasat n "lghul azeggûgh", iorrimen ad llan di sen tcirratin tinna ssenn in mayd iyyan tilelli d imnghi ughris xef tmazirt, xef tusna, xef awal d umzruy ughris n imzwura d tmazirt, urid am tcirratin nnex y lkulij, iwint ghas y ttiffughla d tusna n iberdan d gvarru d ukeyyef, d ac ttinin belli aya d ayd iyyan "tilelli" n tmettudvt tamrrukit! Yyep?! Apa tusna manifgher tudjamt?! Waxxa, ukeyyef maolipc, iwa s zzeldv d uxxub n wadvu nna di s tlla tawtmt tamarrukit?! Atig n tilelli iqseh…

Lhumt nnx tqqn di s tallest, yngha t usemmidv, war anzvar, kuci adjaren nnx umzven "Lantrit", kuci nsn wsssiren, tngha ten tuser d uxxub n wadvu d mcerdvul n icirran nsn nna xatren, ixater itsen mcerdvul, d iqaridven drusen, icirran da txataren d iqaridven da tudrusen! Ur s max?!

Nek d "Rixs", ku tadeggût da ntraoa i tafuyt d ntat da teddu ad tyn dvart n tmezgvida n "LAZPAR".

Yan wass, tekker Mma ad ty attay (le thé). Tsirs tassviniyt d "Ssukker" d liqama, tdda tkcem dix ur s mani, d nek llix ammas n irti mghabalx d tassviniyt, alli toayd ur tufi azgvn nna n "Lqaleb" n Ssukkar! Urs mani t yedda yfraw! Tqqima da ghif s tnada:

-Wili,mani gher yfraw ssukkar?! Iwa Bessmellap Rrehman Rrahim!!

 -          (….)

 -          Bhra ad t ssirsex nta d tassviniyt d ubrrad!

 -          Nek, ur t tzvrix (Waxxa yoezz ghur i ssukkar, ur nnix ad accrex azgvn n "lqaleb" y yat tsfert!)

 -          Iwa pa lojeb n ddunit!!

Cwi, sllix i: «Qay, qay..» n ufzazen, kcmex ammas n ibawen ufix "Riks" illa ymhedv xef tadist, yumzv azgvn n "Lqaleb n Ssukkar" inyr ifassen da t ytfezzva, ghas nta ynnay yi iqqima da ytpezza acwal nns, d uxlao illa s gv allen. Nnix as t i Mma, tusi umchadv n uzmmur, tumzv "Riks" alli ydjiwn taghriyt, tnna s:

 -          Iwa tci t dghi…

Ioayd gher azgvn n lqaleb hmak ad yssmidv ul nns. Kuci idvan (les chiens)  nna ghur nx kkan ssnen i tamazight, Mma da sen tsawal ghas s tmazight, d nipni da tisinn aynna ad asen tini. Apa llan can yits ur as ssinn! Can yits ur da turdvun ad ssiwlen s tmazight bnid n midden, da is tsawalen ghas gv imjjan s ifst!

Bubi, Riks, Wiza, Linda, yyan idvan adimuqratviyn, laheqqac ssnen i tmazight.

Zi mi ghrix ungal nna yaru "Pitlir" y lhebs, zi mi ghrix xf tusna n uydud nns d win ayt Laliman, mani ma ufix can idicel nigh tasghunt nna tsawal xf umzruy n Laliman da t tsaghex, mani ma ylla can "lfilm" n imnghan n "imnghi amedvlan wis II" da ad t tannay:

 -          Pitlir arayaz ighuda, izvil, yca taghriyt i "Britvanya" d "Fransis"… Ifransawin umzven Lmrruk d Dzayer, Pitlir yumzv asen tmazirt nsn, yak?

 -          Pemm, ip!

 -          Nnan belli imazighen ddan d mctid aya zi Laliman, onix Pitlir Bbat nx ayd iyya?

 -          Pemm, ur ssinx…

 -          Max tiwtmin nnx ur yyint am tiwtmin n ayt Laliman?! Tiwtmin nsn jerrdent, ghudant ghur sent allen d tiziyzawin, azzar d azveori matta wya. Max yad tiwtmin (nos femmes) d tcirratin nnx yant am tixnciyin n ubdduz?

 -          Pemmmmm, ur s…

 -          Max alli ymmut Pitlir….

 -          Fst! Adjax ad nssghed, cek tllid tssighd ax timlellay d uxxub n wadvu s "Pitlir" ic, ix tffu! Matta loil ad … yallap fest alli tstvurridvax!

Zrind wussan, ku tsfert da ghur nx ytddu yan umazan d ax yttin belli ixssva x ad nffegh zegv ighrem nnx!

-Mani gher ad neddu?!

Urs, tamazirt tella twseo…

Yan wass gv unbdu, Mma ur telli, nlla ghas nek d wetma taxatart "Cadya", nek ffghex gher urtu ad as qqnex i tydit nnx "Linda", pa can yuk da iy iqqar zi dvart n tawwart n urti, alli ad as rzvmegh tawwart, ufix t ynsa lksuwt n lmxzen, yssufgh di yi allen nns d tizeggûghin, ysghuy ghif i yenna yi:

 -          Is illa bba c!?

 -          Ipi, ur illi…

 -          Is tlla May c?!

 -          Ipi, ur tlli…

 -          Iwa, mayd illan?!

 -          Llix ghas nek d wetma!

 -          Iwa ini as i Bba c ad ghur nx yeddu, ixssva wen ad teffghem zegv ighrem ad.

Ghas nta icmmel awal thuf ghif i Linda tra ad as tkkes udem, ghas cwi! Mur ur t umizvex zi "sselselt" uma tnter as axnfuf nns, isghuy, inna yi:

 -          Amezv tiydit nns nghd ad awix may c (ta mère) gher lhebs cek d ntat (xef Linda)! Tqqim Linda da ghur s tnezzegh ad dt tnter, tra ad as tssenoet uffugh zgv ighrem mimc iyya.

 -          Linda waxxa tya tiydit tssn belli ran ad as kksen urti d ighrem nns, tra ad tssekker imenghi xef umur nnes.

Ussan inu da zrin ghas s ttawil, am tawada n icfer (la tortue). Nek llix ufsex ixf inu ammas n idical n taorabt d win tfransisyt bla  ad pezzax aqcac inu (ma tête), ghas da twjilx i tighri da tasix tiwriqin tumlilin n urcam hmak ad recmex udmawen n midden (les visages, portraits) neghd ijdvadv, tuyya, timizar, tuyya d iydjuyn d "Riks", "Linda", "Bubi", "Wiza"… yan wass ufix y yat tasghunt n irummiyn udm n yan uosvekri arumi n Roma urta ylli Oisa  (un soldat romain de l'antiquité), iojebi yi usix taccitat (le pinceau) d ighman (la peinture à l'eau) rcemx t gv uyadir (le mur) n ighrem nnx, ghmix t s ighman, yix as altcini gv udm d aziza (bleu) gv allen, ydda d ighuda. Mma d istma iojb asent, awd midden nna ghur nx tddun da sen yttiojib, ghas anbyi nna ghur nx yddan da ytannay urcam nna da yttanaf aqmu nns ar imjjan s ubpadv… Dvart n uynna twti yi tawla, tnna yi Mma belli d allen n midden.

Y Lkulij nnx, "Lmudir" awd nta ajbli am Lfqip, "Lmudir" ad, ur issin la i tighri wala i tirra, nta iyya awragh am tghirdvent. Y Lkulij llan awd icirran d tcirratin n lhumt nnx, kuci nnx nya ghas arraw n iosvekriyn, hmak ad tisind arraw n iosvekriyn d arraw n igvraydviyn, arraw n iosvekriyn ghur sen tackkart (taqrabt) n iosvekriyn, ku yuk  di ynx yusi taqrabt n Bba s. Arraw n igvraydviyn da nssan ioban n iosvekriyn n "Lbbvara" (les parachutistes) d usrawl n Bludjin d ssvbaydv axatar n loesvker "Lbrudkan",… Ioban ad da pen nssan awd I jaj n Lkunji d tidrwin (les classes). Llan dix can yits yyan arraw n "Ssifil" ddan d zi berra n Meknass. Llan winna ddanin zi Dxisa (yat taqblit n waoraben), llan winna ddanin zi Mejjatv (yat taqblit i barra n Meknass gv ubrid n Lhajeb,        Iljjadv "les chauves" nipni d imazighen), kuci nsen qqimen i "Lantirna" jaj n lkulij, d ax tssawalen xef tamara d mcerdvul nsn agd utci nna ydrusen d aghrum nna di s ttafen ibuxxa nghd tawjjimt n ugherdva! Din y lkulij, mya ssanx nek d yat tusna yadvnin, ufix yan nek yadvnin, myassanx nek d umzruy, Yuba d Tin-Ulili, amzruy n midden nna llan urta ylli Mass Oisa (avant J.C) am tusna n timizart n Faris d Babil d Mizvran Hemmu Rabi, Ramsis II, Niger-Titii (awd i tmazirt n Mma tella yat tarbat ism ns "Titti"!.

Ammas n icirran ku yuk tella ghur s tusna nns d mayd yssen ad iyy. Nek snex ad rcmex. Llant winna tlapant takurt n udvar, tin n ufus d tin n tazyawt. Apa llan can yits ur ssinen ad yin walu, ghas ad qqiden loafiyt d ighuyyan ammas n icirran jaj n lkulij.

Nek ufix tusna n Amirika d izlan n midden ibxxanen n tamazirt a, midden ad da rzzun xef tilelli nsn d tin tusna nsn. I dvart n imenghan, umzven  abrid n imenghi s tusna d iwaliwen d izlan, am "Little Ricard" ( Rikar amezvyan) d bzzaf di ysen nna ttunghan nghd ttyimzvan y lhbasat, da tsllax i izlan n "Lbluz" d "Rruk and rul", waoraben da s qqaren "musiqa accaghab"! Urs max? Izlan ad, yat taghuyyit d taxatart n midden nna trzzun xef tilelli ammas n tallest, ran ad nzghen amur nsn zi jaj n uqmu n izem waxxa bezzaf xef Bnadem ad yili am izem.

Kuci icirran d tcirratin da nssan ghas "Bludjin" ur iyyi loib, Bludjin s ixf nns iyya yat taghuyyit dat n tusna taqburt d tin war tusna. Umzvex Bludjin inu, flix t zi ifadden rcmex di s "stilu" abxxan udem n yan umarir abxxan n Amrika… Cwi, kuci icirran d ticirratin iwin iy isriwal nsn n Bludjin hmak ad asen yex am winu!

Yan wass, kcmex gher yat taslmadt n taorabt, anli nns iyya am usliy, tnna yi:

 -          Cek! Ffegh gher berra.

 -          Max a "ustada"?!

 -          Ddu ad tnsed can asrawel yadvnin am midden oad awra ghur i..

 -          Waxxa…

Annayex y ismunen inu, raoax di sen, annayex yan memmi s n yan ugvraydvi yensa asrawel n iosvekriyn n "Lbbvara" (les parachutistes) gv idvar nns. Ffghex gher berra bla awal bla sin. Ghas nek ffeqx gher berra ammas n lkulij, yumzvi yi yan uslmad aqdim da yxddem y lbiru, ynna yi:

 -          Mac yaghin?

 -          Walu, ghas taslmadt n taorabt tzzeo iy..

 -          Max? Mayd as tyid?

 -          Walu, ghas ur as yojib asrawel inu..

 -          (!!!) hemmmm.

Yqqim da ytraoa di yi, inna yi:

 -          Iwa awra mun idi ghur s ad t nhawel.. Munx its, nkcem d gher taslmadt m anli aqbur, isiwel as inna s belli loil ad (nek) ighuda, walu di s lbsalt ghas ur as tssind, uma da yttafraw y taorabt, yan loil matta wya.

Aynna yllan, d nek zi tsya nu, berrmex as anli i taslmadt y taorabt. Zi ssyin d nek ilbda d amzwaru, da nssax aynna rix ur da tsawal.

"Lmudir" n lkulij, yan ujbli umlil, iyya am ughrdva n "sswirti", ur yssin ad yamzv awd tasghunt. Ussan da zrin am azvu, imizar urd di ysen qqimen iydjuyn d tuyya am mctid aya, walu benneoman d tafsut, walu ijdvadv, walu… kuci iyya am can tamzirt gv unazir, ghas isnnan, isslliwn d ighrman ixatar war taghudi. Tdda tafsut urs mani t? Idda uzmur d fertvuttvu d tizizwatin urs mani pent? Kuci yumun d azvu. Nqqim ghas nek d Linda da ntraoa y tafuyt d ax tini "Bay, Bay" zi dvart n tmezgvida n Lazvpar.

Yat tifawt, tssekr yi wetma Cadya zik hmak ad as awix tamtunt d liqama zi thant. Ulix deg ubrid nna ytwanin gher Blazvadarm, ufix kuzv n tkamyyut n iosvekriyn peyyan, nsan… alli aoydx (dewlex) zi thanut, ufix kuci adjaren nnx ffghen gher barra da tsawalen ghas s ifsti, ssnx belli can uxxub n wadvu ydda ad ax iwwet.

Adjaren nnx, usin ixfawen  nsn d ifcka nsn, udjan ighrman uran, bla awal, bla sin, yan lhumt yadvnin ssekren imnghan nipni d iosvekriyn d Lbulis, ghas nekkni d can yuts ayd yqqiman gv ighrem. Mma ghas ntat da ttazla zi ssya ghel din. Uma irizen ayt cclaghem d timira rewlen…

 

Lkamyu n loesvker, yumzv abrid s tazzla, da yttafraw, nek y jaj nns da tafrawx zi ssya al din whlex da tcebbarex gv nipni da tggvan ahidus s umnaqqar. Minu (mon chat), mucc nnx da ysmiooiw jaj n txenciyt, mays (sa maman) nudja t din ur t niwiy idnx. Linda da tlapa, da tneqqaz jaj n wul inu awd ntat nzri t din ur t niwiy idnx. Yix loib nek d Linda alli t udjix din ghas ntata i wul nns tdda ad tqqim s lazv d fad… Waxxa imcin, sulx rix ad  yex aosvekri:

 -          Max, ma ytrid loesvker?! Ddu ad tqqimd.

 -          Ur da yteddu ghel loesvker ghas irizen (les hommes), ur da yteqqim y taddart ghas tiwtmin, nek ur yix d tamettudvt hmak ad qqimx y taddart.

 -          Is ur tgwded zi lmut? Yallap ini…

 -          Lmut? Yak ad mmtx xef tmazirt inu, iwa twpen lmut ghas ad mmtex, mctid aya.

Inna yi baba belli ghas winna iteggwden ayd ad ytmettan gv imenghan, nek ddix ad mmtx s ubddi, s taghzi inu. Dix, mec ad ggwdex zi lmut, ur nnix ad ffghegh zi tadist n Mma.

Iqdva wawal - fin.. taggara, isala, yemda, yendva.

  Yura t yan loil amzvya, yan wass n yan useggûs bela askka, i Meknass.

Muhemmed Burhim

 

Copyright 2002 Tawiza. All rights reserved.