Numéro  49

  (Mai  2001)

Amezwaru

 (Page d'accueil) 

Tamazight

Tmazight deg ugraw wis 6 n littihad lictiraki

Azbeg n tbagah

Udem amxib

Icarf ayi wesqar nnem

Isdva d afar axndllas

Uccen d waoraben

Tamghart tamazight jar sin n tisar

Tankwra

Français

Alif-ba-bêtisation

La composition des mots en amazigh

La démocratie dans les associations amazighes

العربية

الأمازيغية في مؤتمر الاتحاد الاشتراكي

سياسة الطالبان ضد الأمازيغية

حوار مع الفنان حمو عكوران

قناة الجزيرة والدعاية للعروبة

عبد الرحمان بن عمرو يتابع نهج الأندلسيين

لمحة عن المعمار الأمازيغي

الأمازيغية والأزمة الجزائرية

ضرب الحصار على أصحاب الانكسار

عودة إلى اتهام عامل الناظور بإحياء الظهير البربري

من أسرار لغتنا الجميلة

مقالات بوغانم خالد وحميدي علي

قبيلة تحافظ على مقوماتها الأمازيغية

أهمية البحث في الثقافة الأمازيغية

تاوادا من أجل الأمازيغية

 

 

 

Tanfust: Azbeg n tbagha (Le bracelet du tabac)

Yura t: Nurdin Bawedra (Goulmima)

  Asifk i Massa n mass Muxlisv.

Ar digh ttmunegh d Yu (maman) s uyenna gher tedda ghas man ad ur i tadj ghas nekkin di taddart. Kigan n tikal wer da ttisinegh mis nedda.

Tkejmen xalti Mama taf aghen Mma d nek; tini yas i Yu:

-Is trid ad teffghed allig telsid iselsa n wufugh!?

-Ddigh ad ddugh mek ddigh ad oezzagh.

-Magh mad immute?!

-Temmut Rqeyya Wbassu n Ayt Ussentaw n Yidir uhru wemzil.

- Rqeyya tamettut n Muha n Tallubant Ayt Hsayn u Zamuren kel wasif?!..

-Talligh ikkan ghur Mbarek u kelferdu n Sekku wedrar n Ayt Umalu!!??

- Ah! Tanna ghur tiwel Qida Hmad n Ayt Tacctat u Tghwessint n igellin u Zayd u teghmert…

- Tennagh…

- I mantur ayd temmut?

- Nnant am twetmin ghur ughlay n tafuyt. Nekkin ucckigh (perdu) i wer ssinegh mi ghef ttemsawalent i tagh i Mma afus tergel tiflut n taddart, nmun d xalti ar nettemmerwal. Umzvent awal n tamedjawt ar sawalent ar ttinint: “tga ta, wer tgi ta!”, “Tenna ta, wer tenni ta!”, “Tiwel ta, wer tgi ta! Tennurzvem ta!”.

Allig i ssenghant ighf. Iwa han awal; anetta asag qqimegh tama n bba ar ikemmey ilin iregzen yadven. Iregzen yedrus (rare) wawal ar kemmin (fumer) cigan. Waqila akwd tayetcin negh tiwetmin negh timgharin mer da kemmint qad asent yedras wawal!

Iregzen da ttghiman ar kemmin agirru, ar ssan ddekka s imiq imiq, ar ttemslulughen irikuten negh ikisanen n watag inger idvudvan nnsen ighwezzafen,  ar sawalen. Izur asen wawal wer id amm twetmin nni yesdid iggidey.

Iregzen gan imegza (intelligents): da ttghiman ard asen d yeddu uyenna ran ar inger ifassen.

“Awimt agh d an ussird!”

“Awimt agh d imekli!”

“Manza yimensi nnagh!”

“Ssergh aman!”

“Suggez d aznnaw!”

“Sird ajerdal (pantalon) nnagh; izir tikeccit (poche)!”

Nitni ghas atag ami ssnen; awd tarda n ifeckan (ustensiles) wer as zmiren. Qqimen ar ttneqwacen ighwenba nnsen sulwun i ycedvran n izennaren rzvem i wafriwen.

Maca akwed tiwetmin wer tent igi; da ttamsent azatim n uzemmur (huile d'olive); wazzar (cheveux) igen am webrid n twuriwin tizayzin, (travaux publics) asaf umsen azeft i webrid i ghef zerrin ileghwman, taght id tafuyt; ikul yan yedvfar tamettut yasey ids aberruy (morceau) n ughrum ar izzruy ard idjiwen. Awd abduz (w.c) wer ghur sent illi; ghas kra n waragh ad ghef trezzvem idvarcen ar tesgicciy abezzif (uriner) ar nttemneqqar izadv ghef unemmutter (fumier), day tazen afus s ugadir tessukkef d yan uberruy n ufendir tsefd (essuyer) iss, yger t awd netta s aragh.

Negh tsen tufid ar tmerrey iwerzan (talon) i yir n tergwa afad tessikey ifurusen (desquamer les gelures). Uma yizukan (fesses) aghulen qquren (dures) s wanect ddagh n tnuyi n ughyul gher Acerg-iyysan, Tekwter, Agerd n uleghwem, Tizi n Taqqa, tighezwin; ar asent ttemhiqqin (secouer) yiffan (seins) allig ten lekmen (atteindre) tastawt. Iwa yiffan ayennagh midd imannadven mid tistiwwa!?

Ad awen ggalegh yan wass ar munegh d Yu s uhemmam azayez (bain public)  i teqqima tama nnegh yat tmetut, dars iffan bzin (gonflé) mghuren, yiwen yumezv aneqqar wayd yumezv aghelluy. Da tsawal ar as ttemhiqqin idmaren i ggwedgh as qqimegh tama n Yu ar ttmuqqulegh.

Wer yad ssinegh ma ghef ttemsawal xalti d Mma, mad ttinint, wers ma ghef ttemsawalent. Ar nttemnuggar (rencontrer) d  ikabaren yadven n twetmin; da sseknunt ughfawen munent d ubrid gint amm iwedfan (fourmis).

Da ttarmegh (essayer) ad sestengh (demander) Yu ghef mas nedda ar i ttebbint twetmin awal g imi, wer i ttadjant ad siwlegh allig meqqtegh rmigh mi gen yettvfegh wasif ddegh aberkan n twetmin d wadvu n tegnart (outre).

Ar ttghimagh tama n iregzen allig yaghul iheyya dari wnaghiz n tbagha (tabac) negh girru amk i as ttinin imeddukal n baba. Waqila awd Mma qad ghur s iheyyu wadvu n tbagha.

Yan wass ar isawal yan weryaz awessar i bba yini yas «Fek agh d itsen wagiruten, lan taddagh dari yellan tessentuter (détériorer) tireggwin n turin (poumons). Wer ssinegh akkw mad as inna; is llan sin wanaten (types) n tbagha? Wers is ten tessen Yu!?»

Maka day ddan ineghbawen (invités) iddu bba s tenwalt (cuisine) ar isawal i twetmin ghef usenwi issenfeh asent advu n tbagha.

Mayd dari yheyyan asag isars yan g iregzen agirru g yir n taseghdant (cendrier) yerzvem i wcarid n waggu (fumée) yeggifey ar tigejda.

Iddegh qqimegh tama n iregzen snighsegh (remarquer) taseghdant hatin degs agirruten wer imyaghen: han wenna ykemmey Bba deg s aqeccur awragh d wayd amellal; han di tteffegh tbagha tungatt. Waddagh (celui-ci) adwal ayd iseddeghsin idmaren n uwessar ddagh.

Yan wass yadven ffghen akkw adjen id ghas nekkin, asigh itsen wagirruten ddugh s berra fekegh ten i ycirran, neddu s igran (forêts) ar nkemmey. Ayayd usugh (tousser) allig da yi yneqqa wgerd, ndvun d imettvawen seg tattviwin inew. Mer i yanney Baba ad i ynegh. Asag (quand) meqquregh akwed nekkin ad kemmigh, ad gegh akemmay. Qad kemmigh tabagha tawraght negh tazegzawt s ucku tungatt da tessengha yidmawen.

Munegh d uswingem allig id tesfafa (réveiller) yat n tmettut yadven tegra yitnan i Yu d xalti; munent digh s krat ar sawalent g yiwet tikkett; kud sghuyyunt, ttusunt, neddpent, ttadsent.

Tiwetmin wer id amm iregzen; iregzen da ttfestan ar ssefliden (écouter) i wenna ysawalen. Ayen illan dar iregzen illa yasen g wallen! Cwant asen wallen, llan itsen iwessaren mi wraghent, yili wenna mi mellulent. Tenna yi Yu: «Wer heyyin ayt wallen timellalin!».

Qqimegh ar seksiwegh allen n ineghbawen, kra mellulent as, yan uwessar dar s yat tewragh tayd tzeggwagh. Yan yadven wer zmiregh ad inniyegh allen  ns, s ucku anecta n ikrarucen (rides) dlant as allen, yan netta yelsa tismaqqalin (lunettes) tiberkanin.

Yan uderghal (aveugle) yunef tent netta wer da yseksiw; ar degs seksiwegh allig i ughant wallen. Ayen illan fekn as amur ns (sa part) s ifassen ns. Awd atag da yattamezv ar issa. Iwa mantur ayd bepdegh day (lorsque) t tannayegh yumezv agirru ar ikemmey; dinnagh ayd ssnegh is yamu (appartenir) ghur iregzen.

    Tizi n Taqqa, 2951.

 

 

 

Copyright 2002 Tawiza. All rights reserved.