Numéro  54, 

  (Octobre  2001)

Amezwaru

 (Page d'accueil) 

Tamazight

B.M.C.E d uslmd n tmazight

Addur n wawal amazigh

Alaghi i yllis n umazigh

Asif n inigiyen

Anoarq n arrif

awal amazigh d tadelsa tazarfant n lmughrib

Azayez igdi

Ddan d

zeg idurar

iri cem d ayel

Tabrat n ibba g lxira

Anebdu

Tamazight

Tillawt

Tizi n taqqa

Tuga

Tungalt n yict n tnegmit

udem amxib

xnifra nnegh

Français

Mots et choses amazighs

Internet et les publications sur tamazight

Etat de légitime défense

Les dimensions amazighes du patriotisme marocain

Le sens civilisationnel chez imazighen

La presse nationale et le lobby saoudien

Quelle découverte à fait un prix nobel?

Le silence qui parle

Le journal de M.Ziyane exhibe son amazighophobie

العربية

مشروع م.ب.س. لتدريس الأمازيغية

تعدد اللهجات الأمازيغية وسؤال التوحيد

الخطاب الملكي: مرحلة جديدة في تاريخ المغرب

 

 

 

 

Ungal:

Anebdu 

  3 - Tafaska tamezvyant (Oid Alfitvr)

Itari dt: Lmeddan Oumar Numid (Tvnaja)

Ghar ughedjuy n tfuct n wass wis simraw d tza(29) zeg uyûr n uzvummi, i ssentan yewdan, s temgharin d yaryazen, s umezvyan d umeqran trajan ayûr n tafaska ad ibedd. Ca yeffegh d ghar wazzay, ca yenya x tzeghwin n tudrin, ca yuri sennej i tseklutin (arbres). Arrin s wudmawen nsen marra yidsen ghar idurar n Yzoumen.

Isama (se diriger vers) Massin aked wetcma s Zulixa ghar ughezdis azermadv n taddart nsen manis zemmaren ad hdvan yûr.

Mghar tessenta ad tendver tadjest, tesran i ca n yewdan tbarhen qqaren «a yeqqa dt dipa, yûr ibedd!». Yinnidven sghuyyun am twucin dipa d dipaniti nnan «Pa yeqqa dt jar idurar in dipa!..».

Sriwerwent ca n temgharin d ca n thenjirin di dcar in d win. Yisi Massin s tittvawin nnes sennej i ydurar, yentveh deg wyûr nni, itwara dt d azdad am ufiru. Yuca aked wur nnes ineddu s tazzra. Yesghuy deg wjenna, yenna s i wetcma s:

-           «A wap, d tidett ibedd, a yeqqa m dt dipa jar sin n idurar in, yeggûr ad yeghri awarn asen».

Isseccen as dt s udvadv n ufus nnes. Teswedv nettat ghar din, tqesseh tittvawin nnes tentveh ura d nettat day s, uca tenna s:

-           «Wap, twarigh dt, maca d azdad attvas!».

Zi ssin dewren s tazzra ghar ugensu n taddart huma ad ssiwdven aneghmis a yesbarripen i yemmat sen.

Tenkar Tvuca zic huma ad tessufegh “rfeddvart” n tafaska. Tfardv taddart marra. Tessired it. Teggû trid. Tqam atay, uca tessekkar d tarwa nnes marra zeg idves.

Tenqar d tfuct d tazeggûght zi tiyyart. Tesfaw (éclairer) agama (la nature) n Ighzvar n Uriri. Djawen yijdvad, dvwin ad arzun min gh ad ccen. Ijjiwen Massin rxezvrat di tfuct n tuffut isemdven war iteqsen di tmughri. Ssentan rghaci tmuttuyen deg ibriden. Ca ytari d zeg wedcir a, ca zeg win. Ijj itextuttur d ssa, wennedvni ssipa. Ggûren marra idsen ghar temzida n Ddpar huma ad zzvadjen tzvadjit n tafaska. Attvas idsen  ardvin d izedjuba d icemraren. Udrusen yinni yardvin initen (couleurs).

Barken imezzvidja tafaska jar asen awarni umi tenfarar tzvadjit. Msafadven aked wayawya, msebdvan x ibriden itawyen ghar tudrin nsen.

Ibarek Massin i yemma s d wtcma s d yaytma s marra. Yardv arrudv d amaynu. Yeffegh ghar barra huma ad imsagar aked imeddukar nnes d inadasen d yinn marra i d as itasen, ad asen ibarek marra tafaska.

Yemsagar aked Sifaw d Tutu d Usekkur. Tugha ten marra umsen rhenni i yfassen. Irdven d arrudv d amaynu. Qqimen x ict n tbadut aked ughezdis n taddart n Sifaw. Mparraden, dvsvan, iraren, sseccnen rhenni i wayawya, xzvaren ma yugha xef ifassen nsen nigh upu.

Iwecwec as Sifaw i Massin deg wmezzugh, yenna s:

-           «Nunja tuss d! Twarid man ten? Tenni i xef d ac ssiwregh deg idv azamur!».

Yenna s Massin:

-           Tra zadj! Mermi i d tusa? Ma ass a nigh?».

Yarra xaf s Sifaw:

-           «Wap, teteffu t id da! Ser ad ac inigh! Kk d xaf i ghar sdvis n tadeggût (l'après-midi), uca ad nrah ad t nzvar. Rexdenni ad tiri fghent id nettat d yesma s ad oewnent zzat i taddart nsent. Svafi, d wa d awar!».

Yarra xaf s Massin s usrid mebra ma ad ixarrves:

-           «Wap, d wa d awar, ad xaf k d kkegh ghar sdvis, maca raja, ghar  k ad tefghed zi taddart, svafi nekkes awar, waxxa?».Yenna s d Sifaw:

-           «Waxxa, d wenni d awar!».

Ha aregben x weorûr n wedcir nsen, twaran yessi s n Mimun irdvent arrudv d amaynu, tirarent di tehwict n taddart nsent. Tedja kid sent icten d tamaynut, oemmars ma yezvri t Massin. Mghar yentveh day s s tittvawin uneggaru ya, yesseqsa Sifaw:

-           «Min teona tin dipa kid sent? Ma d Nunja nigh?».

Yedvsva, uca yarr d xaf s awarni umi iskef aqennin:

-           «Wap nican, d nettat! Mamec d ac d tusa?».

Yesfarnen, yisi aghir nnes yegga dt xef tghardvin n Sifaw, uca yarra xaf s:

-           «Tesbeh, a yamedduker inu am tnewwact i xef tenqar tvya n tfuct!».

Ttazzer di tehwict, ttirar  tnettvu am tsekkûrt di tagant (forêt) jar tseklutin n uzemmur d tinni n djewz d wurtan i d issendayen s tazart. Ttawi-ttarra s waddud acedvbi am tgheydet n wezghar yufin array nnes. Ttemraywa x umessuci s arrimet tareqqaght am tenni n useymi. Tirdv arrudv d atrar d amaynu. Yarni yas deg ûzvri xef wenni i d as yuca arebbi. Aghembub n tziri yareq s tifawin, yesqada d tvya nnes isbarrip urawen. Acewwaf d abarcan yennufser as d x weorûr, itawi dt reowin itarra dt am imuzzar (cascades) n waman i d yeregben xef waddar. Tittvawin mgharent, tsiqsiqent am itran di tadjest n idvan (nuits) n unebdu.

D wa d azvri agmawi amdad (véritable) n Nunja yedji s n idurar n Arrif, yedjin Massin zi ssin d tsawent war ibettvi jar yidv d uzir, jar tfawt d tadjest, jar idvennatdv d tiwecca, minzi zeg yidv d uzir yezvra Nunja, d tasmaqqatc (image) tezdegh jar tittvawin nnes. Mara yettves itûrja t, mara inkar yekkar itxarrves day s. Zi ssin war yeqqim yessen ma netta d netta nigh d ca n yijjen nnidven irur d d amaynu. War yessin ma netta s uguggu (santé mentale) nnes nigh d abupari.

Yexzvar ghar wudem nnes isvebhen ca n rxezvrat war ghar sent buneggar, ccûrent s iseqsan n tuxsa d tayri. Tarr d xaf s ura d nattat s ca n rxezvrat. Tessekk as tent id am ijj n useyni n tayri yarceg deg wysum n yedmaren nnes i ycarreg huma  ad yadef ghar radjagh n wur ad ini yezdegh i rebda. Tarni tesqad as d ijj n wesfarnen yareq am tmessi, yessecmedv as ur. Dinni i yuca aked ixf nnes yeffegh zeg ixf nnes, yedwer yemsebdva xef sin n ixfawen: ijj n yixf d aterjan (rêveur) d wenni yeffghen yegga yafriwen yedvwa ghar ujenna, yeqqim itennedv i Nunja am ufartu itniqar i tmessi  mermi mma ghar s gh ad yeswizzvedv iri tettvef d day s war ttjji wi t gh ad yesxesyen. Yeqqim yixf a itûrja wapa, isekka ighrimen (châteaux)  s ict n tnezruft (désert), ha ad issudv usemmidv nigh ad yadar wenzvar iri yadri ten d ghar tmûrt. D ta d tudart tamarzagt n wenni itexsen taziri u war ghar s tizemmar ura d afriwen. Ujar z manaya, yessen belli netta oemmars ad yawedv ghar tiziri. Manaya d anuggim (impossible).

Ixf nnedvni wis sin netta d iraw (réel). War yeqqim ibedd x tmûrt, war yedvwi ghar ujenna am wenni amezwaru, war yeski idurar ujaren yinni n pimalaya jar as d Nunja. Yeghza ighzvar n tmessi jar as d d Nunja. Itwara t temghar tezzuggar am ousag (géant) tujar s tiddi nnes tiqicwin n idurar. Netta zzat s d amezvyan am uoidvun ( nain). Baba s nettat ghar s agra yemghar, yabber di Pulanda. Netta d amezrudv war ghar s walu. Yeqqim ha itxarrves yeqqar deg ur nnes: “Waxxa, necc imara texsegh t s wur d yixsan, oemmars ad tiri d tamghart inu. Tiwecca nigh farwayecca ad d yass ijjen mamec mma yegga ad yiri ghar s agra ad t yecqedv zeg wfus inu!”. Izemmar ad yegg ict n tmesract wapa: izemmar ad t yexs zi raggûj wapa, ad t issezdegh deg ur nnes amecnaw ict n tirjet tezwegh s tmessi oemmars ad texsi! D manaya umi izemmar, ca nnidven itghima d tûrja wapa oemmars ad irint.

Tugha Sifaw izzamuj akid s, maca netta war d as yarri taynit, war yessin min yeqqar, war yuci ha aked ict n tsadjest tbedd jar tittvawin nnes d Nunja. Itghir as ghar umezwar yedwer d advarghar, maca netta d fus n sifaw itawyen itarra arendad i tmughri nnes. Umi i d as yarra taynit, issars as Sifaw fus x wur, yesghuy deg wjenna, yenna s:

-           «Wayyaw ayyaw! Mayemmi ineddu wur nenc ammu? Yegûr ad yeffegh zeg wraq nnes! Min cek yughin a zmar abarcan? Ma svafi itwayer wur nnec zi rxezvrat tamezwarut?»

Idvsva Sifaw awarni umi d as yenna awaren a, yedvsva ura d Massin, maca qqiment tittvawin nnes sekkwdvent ghar Nunja m wazvri icewwaren. Yarzvem aqemmum huma ad yarr xef Sifaw:

-           «Qao azvri ya war cek itejji ad tetwayred zi twarat tamezwarut! Yiwi yi d arebbi imara yezvra t ca n yijjen ha di tirja ad t yexs s wur d yixsan nigh upu?».

-           «Nican a yamedduker, wi gh ad yeodun tanewwact am tin war ghar s iswizzvidv s ufus nnes?».

Yedvra d ghar twengimt nnes deg ukud umi dja yessawar aked Sifaw ijj n uxarrvis. Netta Nunja yesn it. Tifras nnes war xaf s weddvarent ca. Yessenta iswingim arami i t yufa uca yenna s i Sifaw:

-           «Tessned, a Sifaw, Nunja snegh tet».

-           «Upu, tesxarriqed, manaya d anuggim! Nettat attavs zeg ûmi i teffegh ssa, u rexxu tzeddegh di Tvanja, oemmars ma tuss d ghar da ar aseggûs a, mamec gh ad tegged cek ad t tessned?»

-           «Ssawaregh akid c nican, nnigh ac ssnegh tet iwa ssnegh tet, tugha t zzat ma ad tenoarq ghar Tvanja aked imawalen nnes, teqqar akid i di tighuri tamezwarut di Kebdani, yiwiy ayi d arebbi teghra kid i ca n sin n iseggusa nigh ad ac inigh kradv. Tugha negh netmun marra itnegh i webrid xminni nteddu ghar ugherbaz d xminni i d neddakkûr. Mechar nru marra, mechar nedvsva! Mechar n isvuraf i negga aked wayawya! D mechar i nuri nedvra deg wbrid n Yemzvughen! Mechar xaf i txeyyeq! Mechar xaf s xeyqegh!… Mechar i nekkes d tidrin, mechar nucar d tazart zeg wzaragh! Manaya marra axmi yemsar idvennatv, oad twarigh dt jar tittvawin inu. Mechar d arekkudv i necca zeg ifassen n isermaden war gh asen yedji wur! Mechar nesfedv d imettvawen! Mechar neshissef aked wayawya! Maca amcum a n wakud yebdva jar anegh!».

Yeswingem ura d Sifaw di temzvi nnes d marra min xaf s yekkin, yeshissef aked umedduker nnes uca yenna s:

-           «Nican, dja netmun marra itnegh tarwa n wedcir nnegh am wawmaten s iwtman d tiwetmin, maca ha nemghar drust war ssinegh wi yebdvan jar anegh d akid sent! Qao cek txarssed day s turid tessned tet».

-           «Wi yessnen?!».

Targeb tfuct awarni ydurar, war tejji awarna s ha tezwegh n tvya nnes, tessenta tadjest ad tendver, dewren iwdan ghar  tudrin nsen, udfen ihenjiren imezvyanen ghar wexxam n yemmat sen. Tekkar Nunja d yesma s kecment ura d nitenti ghar waduf n taddart nsent. Tendver d tadjest. Ssentan ca n yitran tsiqsiqen deg wjenna yebbarecnen. (Ad yetwadvfar)

Copyright 2002 Tawiza. All rights reserved.